May 12, 2022; Naktuk March 13 ah sawrkar siamfel ngei ngei a ngaih tawh laiin, Mara Autonomous District Council (MADC) ah he thu ziahlai thleng hian sawrkarna siam tur a la chiang lo zel a, Mizoram Governor chuan protem chairman atan BJP ticket a thlan tlin K. Hrahmo a ruat. Hetihlai hian ruahmanna awmsa thulh a nih loh chuan naktuk zing dar 7:30 hian Siaha ah MNF leh INC hruaitute bakah MDC thlantlin te chuan meeting an nei dawn nia thudawn a ni. 

Siaha atanga ZALEN thudawn danin, MADC inthlanpui neih zawh taka seat 9 latu, MNF chuan seat 4 latu INC chu Chief Executive Member (CEM), Executive Member (EM) 3 leh nominated seat ken an tiam a, seat 12 la tu leh sawrkarna siam tura seat 1 chiah mamawh, BJP lam erawh chuan INC hi CEM an kian thei lo thung a, Dy. Chief Whip leh Adviser to CEM te an offer thung.

Hetihlai hian central lam BJP chuan tunhnai khan Mizoram BJP chu MADC ah INC thawhpui lo turin a rawn hriattir nia thudawn ni bawkin, an siam pui a nih pawhin INC MDC te chu BJP ah an lut tur a ni, chumi a nih loh chuan kawng a awm lo tih an rawn hriattir nia thudawn a ni. BJP lam chuan INC ticket a MDC tling te chu mimal anga an rim rualin, MNF lam pawh an rim reng a, BJP a kal an awm dawn leh dawn loh engmah hriat theih a la ni lo nia thudawn a ni bawk.

Siaha atanga ZALEN thudawnna chuan ruahmanna awmsa thulh a nih loh chuan naktuk zing dar 7:30 ah MNF leh INC chuan MADC sawrkar thar siam tur chungchangah meeting an nei dawn tih sawiin, thutlukna leh inremna mumal erawh an siam thei angem tih sawi lawk theih a ni lo thung.

Hetianga sawrkarna siam tur a la chian loh lai hian, vawiin khan District Council & Minority Affairs Department changtu - Secretary, Maria CT Zuali chuan notification chhuahin, naktuk 13.5.2022 a MADC term thar vawi khat thutkhawmna tur atan 07-Chakhei bial atanga thlantlin K. Hrahmo chu protem chairman atan ruat a ni. (Protem chairman chu chairman nghet/thar tur thlanna neih tur a chair hna lo thawk tur a ni)

Naktuk March 13 ah MADC sawrkar thar siamfel ngei ngei a ngai tawh a, an thei lo a nih chuan Governor rules ah awmin, a tul angin inthlan that (re-poll) thlengin hmalakna kalpui theih a ni ang. Hetihlai hian MDC thlan thar 25 te chu vawiin khan rinawmna thu tiamtirin MDC atan lakluh an ni.