May 4, 2022; Naktuk May 5, 2022 (Ningani)-a Mara Autonomous District Council (MADC)-a member of district council (MDC) inthlanpui neih turah nimin thleng khan Model Code of Conduct bawhchhia a inpuhna complaint 3 a lut a, chungte chu BJP atanga lut vek a ni.

BJP, Siaha district chuan MNF Siaha district Vice President-in Model Code of Conduct a bawhchhiaah ngaiin a lakah April 30, Inrinni khan District Election Officer, MADC inthlanpui atana Returning Officer ni bawk hnenah complaint an thehlut a. Construction of Girls Hostel hmingin Tipi Ferry P/S (local body) sak hna thawk tura thlanna lehkha Siaha district-a MNF Vice President-in tun hnaiah an party seal chhut hnan a pek avangin BJP hian DEO hnenah complaint an thehlut a, dan anga hma la turin an ngen a ni.

BJP, Siaha district President chuan MNF Siaha district Vice President chu Election Model Code of Conduct bawhchhiaah puhin, May 2, Thawhtanni khan Returning Officer hnenah ziakin a zualko bawk a.

BJP thuchhuah tarlan danin, MADC huam chhungah Model Code of Conduct puan a nih hnuah MNF Siaha district Vice President-in Tipi Primary School girls toilet sakna tur Rs 3,50,000 pekna a tichhuak. Returning Officer pawhin MNF Vice President chu insawifiah turin a hriattir nghal a ni.

Tipa atangin Theiva khuaah MNF mi leh sate tan buhfai thahnem tak pek chhuah a ni bawk tih sawiin BJP chuan, "Hei hi Model Code of Conduct bawhchhiatna leh Maraland mipui hmuhsitna a ni," an ti. Hemi chungchangah hian BJP chuan Returning Officer-ah complaint an thehlut bawk.

Siaha district thuneitute hnen atanga ZALEN thudawn danin, Model Code of Conduct bawhchhia a puh te chuan 'insawifiahna' thuneitute hnenah ziakin an thlen vek tawh a ni.

• MADC inthlanpui: 2022

Voters 42,326 awmin, polling station 81 leh polling booth 81 a awm dawn a. 23 - Siaha East-II chu voters tamna ber niin, 2,808 an awm a, voters 1,057 awmna 01 - Tokalo chu voters tlemna ber an ni. 

Naktuk May 5 zing dar 7 atanga tlai dar 5 thleng vote thlak a ni ang. Vote tlate chu May 9, 2022, Thawntanni zing dar 10 atanga chhiar tur a ni.

MADC inthlan chuh tur hian MNF leh BJP-in seat 25, Congress party-in seat 23 leh ZPM-in seat pariat an chuh dawn a, mi panga in independent candidate ni turin hming an pe lut bawk. Candidate awm zawng zawng mi 86 an ni.