Maharashtra-a Raigad district-a bus chesual avangin mi 12 vel thiin mi 27-in hliam an tuar bawk.

Bus hi Mumbai-Pune highway-a tlan niin kawng thlang kawrah Inrinni zing hma takah a tlan liam tih police-in an sawi.

Mi mal enkawl bus niin traditional music troupe member, Pune atanga Mumbai pana kalte phurin Shingroba temple bula kawrah a tlan liam a ni.

“Bus hian Mumbai-a Goregaon mi, ‘Baji Prabhu Vaadak Group’ member-te a phur a. Pune district-a Goregaon-a Pimpri Chinchwad-a hun an hmang zo haw niin Inrinni zing dar 1:00 vela chhuak an ni,” tiin police hotuin a sawi a. An zinga mi 12 vel thiin mi dang 27 hliam an awm tih a sawi bawk.

Hliam tuar leh thite hi Mumbai-a Sion leh Goregaon-a mite leh Palghar district-a Virar mite an ni hlawm tih Raigad Superintendent of Police (SP) Somnath Gharge chuan a sawi.

Hliam tuarte hi Khopoli Rural Hospital-ah dah luh an ni tih a sawi bawk.

Additional SP Atul Zende chuan thi leh hliamte hi kum 18 leh 25 inkar an ni hlawm tih a sawi. Police leh trekker group-ten chhanchhuah hna an thawk mek tih a sawi bawk.

Khopoli khua hi Mumbai atanga km 70 vela hla a ni.