Aizawl: Transport Minister TJ Lalnuntluanga chuan, "Mahni hnam nihphung kalsan a changkan san hi thil pawi tak a ni," a ti.

Transport Minister TJ Lalnuntluanga chuan he thu hi Calcutta Mizo Welfare Association (CMWA) in Zirtawpni kaltaa Chapchar Kut lawmna hun Mizoram House, New Town, Kolkata a an buatsaih hmanpuina ah he thu hi sawiin, "Chapchar kut hi hlawhchhamna leh beidawnna atanga lo chhuak angin sawi thin ni mahse, zirtirna tha tak a keng telin ka hria a, chu chu khawvel hi a eng zawnga thlir thiam a tulin beiseina nung kan hmalam hun hi kan pan tur a ni," ti a. Hnam nihphung ziarang chawisan leh chhawm nun zel a pawimawh thu a sawi.

Minister chuan, "Ram a lo changkang zela, hnam-in changkan lam kan pan zel bawk a, hetih rual hian kan hnam nihphung zia rang mila kan than chhoh hi a tul tak zet a. Khawvelin hma a sawn a, hnam dang hovin hma an sawn a, kan hnam pawhin Pathian zarah hma kan sawn ve zel ang," tiin kalkhawm te chu ram leh hnam a him a, kan dam khawchhuah zel nan kan hnam nih phung zah pui lo in chhawm nung zel turin a fuih a ni. 

Minister chuan Social media hmanna kawngah fimkhur a tul thu sawiin, "Kan thu hriat leh chhiar te hi thu dik a ni em tih te hi bel chiang hmasa thin ila; ngaihtuah chiang lo taka thil kan ngaihruatna nen kan va sawi ve vak vak khan mi te rilru kan va hliam viau thei a ni tih hre rengin, social media a kan thil sawi leh kan thiltih ah te pawh kristian kan nih anga hawihhawm taka tawngkam hman te pawh a hnam anga kan in zir thar a ngai viau in ka hria," a ti a. Minister TJ Lalnuntluanga chuan hmasawnna a pawimawh rualin Mizoram leh hnam a him a, hnam zalen leh ram ralmuang kan nih reng chu thil paiwmawh tak anih thusawiin hemi kawngah hian ngaihtuahna leh rilru hrisel put thiam a pawimawh a, kan thiamna leh finna te mi dang fuihpawrh nan kan hman chuan nghawng tha lo tak a nei theiin ka hria a chuvangin kan thiamna leh finna te hi midang tana malsawmna a nih thei nan kan hman a pawimawhin a tul hle a ni, a ti bawk. 

Kolkata a Chapchar Kut lawmna programme hi chawng hniha  hman niin chhawngkhatna hi Rev. JC Lalramliana, President, CMWA in a kaihruai a, chawng hnihna programme ah hian hnam lam leh zai ten nen hun hman a ni a. Joint Resident Commissioner Mizoram House Kolkata Jacob Lalawmpuia pawhin thusawina hun neiin Chapchar Kut ngaihhlut a tulzia te a sawi a ni.