South Carolina, United States-a pisa chhuar vel tifaia hnathawk chuan thlalak hlui tak pakhat a chhar chu a neitute hnenah a kir leh.

Sunbelt Rentals hnuaia social media manager Chris Dyches chuan hnathawktute hian Fort Mill-a company headquarters an tihfainaah thlalak hlui pakhat, sipaiin medal an dawng lai ni awm tak an hmuh thu a sawi.

Thlalakah hian thu, “With love, your brother, Joe,” tih a inziak bawk.

“Mak tak maiin tute nge zawn chhuah duhna kan nei nghal ta ringawt a ni,” tiin Dyches chuan Queen City News hnenah a sawi.

Dyches-a hian an thlalak chhar chu LinkedIn-ah a dah chhuak a, a lo hmutute chuan a neitu hriat chhuah a nih theih nan an lo thehdarh (share) chhawng veleh ta chiam a ni.

Thlalak thehdarh hi Lisa Coyne-i hnen a lo thleng a, ani hi Sunbelt-ah hian a vahnu, Kathy Gorton-i a thawk nghe nghe.

Gorton-i hian thlalaka medal dangtu chu a pa, Joe Wateski a nih thu leh Indopui II-na hun lai khan combat mission-a vawi 62 zet thlawk chhuak a ni tih a hre ta a ni.

“A mak a ni tawp mai, hetiangin thlalak ka hmu chhuak ang tih ka suangtuah phah ngai lo,” tiin Gorton-i chuan a sawi.

Chu thlalak a nei let leh thei chu a tan chuan a hlu tak zet tih a sawi a, a pa thlalak hi a ngah lo va, a tan chuan a hlu hle niin a sawi.

“Scrapbook chhah tha tak kan nei \hin a; mahse, kum 1972-a Hurricane Agnes thawkah khan kan in tui lianin a la a, kan tibo ta daih si a ni,” a ti.