Pakistan-a Larkana-a cheng, Mangi chhungkua chuan danglam takin Guinness World Records-ah hming chuanna an nei a. Member pakua an ni a, an zavaiin birthday an intawm tlat.

Ameer Ali-a leh a nupui, Khudeja te hian fa pasarih an nei a, an nupa bakah an fate zawng zawng hi August 1-ah vek an piang niin GWR chuan a sawi a, chhungkaw khata piancham intawm tam ber an ni.

An fate hi kum 19 leh 30 inkar an ni tawh a. A upa ber chu Sindhoo niin nau phir hmeichhia pahnih, Sasui leh Sapna a nei a. Anni dawtah hian Aamir, Ambar leh an naupang ber hi phir bawk niin mipa, Ammar leh Ahmar an ni ve thung.

Mangi chhungkua hi ni inanga unau piang tam ber record an siam nghal bawk a. An fate record siam hma hian United States-a Cummins unau chu birthday intawm tam ber an ni a. Panga niin February 20-ah vek, kum 1952 leh 1966 inkarah an piang hlawm a ni tih GWR website chuan a tar lang.