Fashion show-ah hian thawmhnaw leh hmai hnawih buaipuitute hian a mawi leh nalh piah lamah thlirtute sawi zui hlawh  thil pho chhuah an tum thin a, tun laiah phei chuan danglam tak taka an model-te chei an ching lehzual.

Tun hnaia tharlâm tak pakhatah pawh Kylie Jenner-i pawh Paris Fashion Week-ah Schiaparelli couture runway-ah sakeibaknei lu nen an thawh chhuahtir a nih kha!

Thil danglam leh mi mit la zartu dang pawh a awm a, chu chu model pakhatin a thawmhnaw inbelah dawhkan khuhna a chhawm tel mauh mai a, hei mai hi duhtawk lovin a dawhkan khuhna chungah chuan ei leh in tur a inchhawp tel thlap bawk!

He video hi internet khawvelah pawh a darh nasa hle a, a show neitute duh ang ngeiin mi mit a la a, sawi zui a hlawh hle a ni.

Unau designer, Nanna leh Simon Wick te chuan Copenhagen Fashion Week-a Autumn/Winter 2023-ah an model hi an pho chhuak a.  A video hi clothing brand (di)vision pawhin Instagram-ah an dah chhuak nghe nghe.

Model hi Sarah Dahl a ni a, runway-a a kawra a hnuh tel, dawhkan khuhna chungah hian a then ei tawh chaw plate, bati, sikret bung leh sawmna lehkha (card invitation) var bakah uaiin no bua a awm.

Dahl-i thawmhnaw hak chhuah tak hi corset senno leh pawnfen chhihing niin hei hi chu thil danglam vak a ni lo va, a kalpui chu a danglam ta em a, a hmuna thlirtute lawm leh mak tih a hlawh a. A dawhkan khuhna leh a ei tur chhawmte chu runway-ah a hnuk delh delh a ni.

Instagram-a a vido an dah pawhin sawi zui a hlawh a, thenkhat chuan an thil hmuhin a barakhaih takzet thu an sawi hlawm.