Unau mipa pahnihte chuan ‘mihring vun ang tak’ hmaikawr vuahin putar lemah an insiam a, tlereuh dawr rawkin sana man to, £15,000 man zet mai, Rolex an ru chhuak a, man leh tawh an ni thung. 

Heng unaute hian an car hnunga bungraw phurhnaah an hmaikawr hi lo la dah tha hlauh lo sela chuan an man kher a rinawm loh nghe nghe.

Dawr an rawk atanga chawlhkar eng emaw zat a liam hnuah pakhat zawk hi a lirthei khalh lai police-in an lo tiding a ni.

A car-ah hian hmaikawr pahnih a lo awm a, DNA an endik chuan an unau nen a lo inmil chiah a. Hei bakah hian car-ah hian ipa pakhatah hrei tê, chemte leh hrui fei chi a lo awm bawk a ni.

George Murphy-Bristow-a hi a car khalh lai an tihdinna hmunah hian man nghal a ni a. Forensic thiamten hmaikawra chil awm an endik hnuah inrawkna leh an unau chu a lo inmil chiah a, a hnuah u, Benjamin Murphy chu hmun hrangah an man zui leh ta a ni.

Dawr an rawk hi September 27, 2021 daih tawhah khan niin Epping High Street, Epping, UK-a dawr pakhat a ni a, an unau hian putar ang chiaha insiamin a hrangin an lut a ni.

An hmaikawr hman hi mihring vun nen a inang hle a, tar angin an chal a kawlh a, sam lem, tuak tawh an hmang bawk a. Hripui len laia hmai tuamna (medical mask) pawlin an hmui bawr an tuam leh bawk.

Essex Police chuan an hmaikawr hman hi ‘a tak ang deuhthaw’ tiin an sawi hial a ni.

Tar tak tak angin kutkawr an bun a, kawrchung fual an ha ve ve a. Heta an kawr hak pawh hi an car-ah hian hmuh tel a ni.

An unau hian thawktute an vau bet a. Dawra thawk pakhat chu hruiin thutthlengah an thlung bet a, a banreka Rolex a bun chu an chhuhsak a ni.

Chemte leh hrei te nen thawktute hi an vau bet a, alarm a rik hnuah an tlan chhuak a, pawna lirthei inhung hmangin an tlanchhe zui ta a ni.

An unau hian Basildon Crown Court-a an chungthu rel niin belhkhawmin kum 31 zet tang turin hrem an ni.

Kum 37 mi, Murphy-a hi mi rawk leh hriamhrei kawl vanga hrem a ni a, kum 18 tang tura tih a ni.

Kum 28 mi, Murphy-Bristow thung hi mi rawk, hriamhrei kawl leh mi rawk nana hmang a nih avangin kum 13 tang tura tih a ni.

An unau hian June, 2021 pawh khan mi rawk vanga man an ni a, hemi tum hian Southend-on-Sea Magistrates’ Court-a an inlanin hrem an ni lo hlauh.