Spanish high court chuan tlangval pakhat, saruaka khawlaia a kal avanga pawisa an chawitir chu dan lo tiin hetianga awm tur hian zalenna a nei tiin phalna a pe.

Valencia region-a khuaa he pa hi ruakin khawlaiah a kal a, man niin pawisa pawh chawitir a ni a; mahse, court-a thlen a nih hnuah ruaka awm chu phalsak a ni.

Court hniam zawkin a hrem tawhna chu an region-a high court chuan ngaihtuah nawnin Valencia khawpui bul, Aldaia khawlaia ruaka a kal avanga hrem tur a nih loh thuin thu a titlu.

Kum 29 mi, Alejandro Colomar-a hi court-ah pawh hiking boot chauh bunin a thleng a, building a luh hmain thawmhnaw dang inbel belh tura tih a ni nghe nghe a. A chungthu an ngaihtuahnaah chuan hrem a ni chu a duhthlan theihna zalenna tihbawrhbansakna a nih thu a sawi.

Colomar-a hian kum 2020 atang khan vantlang zinga ruaka awm hi a chin tan thu leh mi tam zawkin sawisel leh deu aiin thlawpna a dawng tam zawk tih Reuters hnenah a sawi a, chemte nena vauna erawh a tawng tawh tih a sawi bawk.

“Min chawitir chhan hi engmah a awm lo,” a ti a. “Inpho lanna uchuak tiin min sawi a. Mipat hmeichhiatna lam thil ka ti lo va, engmah dang tih ka nei lo,” a ti.

Spain-ah hian kum 1988 daih tawhah khan vantlanga ruaka awm hi phal a ni tawh a, khawlaiah an leng thei a. Hetih lai hian region thenkhat, Valladolid leh Barcelona angah chuan tuipui kam a nih loh chuan phal loh a ni a. Court chuan Colomar-a khawlai lenna hmun, Aldaia khuaah hian phal lohna dan a awm lo tih a sawi.