Texas, United States-a tlawmngai pawl leh museum tangdun chuan Guinness World Record thar siamin khawvela lehkhabu lian ber an tichhuak a, feet 7 zeta sang leh feet 11-a hlai a ni.

Literacy nonprofit iWRITE leh The Bryan Museum, Galveston tangdun hian lehkhabu pakhat, ‘I Am Texas’ tih chu a lian chiin an siam a, he lehkhabuah hian Texas-a zirlai naupang tete 1,000-te thu ziak leh milem ziah dah a ni a, a ziaktute hi pawl thum leh 12 inkar an ni.

Lehkhabu hi a tê, lehkhabu pangngai tiat pawh siam a ni tho va, a lian hi feet 7-a sang, feet 11-a hlai niin pound 496 zeta rit a ni.

He lehkhabu lian tak hi Guinness World Records chuan ‘khawvela lian ber’ tiin a chhinchhiah tawh a, Texas fankualpui a ni dawn a, November 24 hian Houston-a H-E-B Thanksgiving Day Parade-ah pawh pho chhuah a ni ang.