Khawi hmun leh ramah pawh library atanga lehkhabu hawhin dah kir hun bi tuk thin a ni a, a huna kir loh chuan chawi a ni thin. Tun tumna Canada-a mi hi chu a kir har ve khawp mai a, kum 51 zet a hawh hnuah a kir chauh va; mahse, a lehkhabu hi a la him tha hle thung.

South Hill Branch, Vancouver Public Library-in an Instagram-a thlalak leh thu an dah chhuahah chuan lehkhabu hawhtu hian lehkhathem (note) dah telin hetah hian, “From your library, very sorry it's a bit late. ‘51 Years’ but in very nice condition. Thank you!” tih a ziak tel a ni.

Lehkhabu hi ‘The Telescope’ tih niin Harry Edward Neil-a ziah a ni a, thlalak pho chhuahah a lan dan chuan lehkhabu hawh kir hun tur hi April 20, 1971 daih tawh kha a ni.

Library-in thu an tar chhuahah hian an hlimpui thu leh kir tlai avanga chawi tur pawh an chawitir dawn loh thu an tar lang tel a ni.