Alabama, United States-a pitar pakhat chuan high school-a kal laia dil pakhata a zungbun tihbo chu kum 53 zet a liam hnuah a hmu leh nawlh mai. California dil pakhata a zungbun tihbo hi nupa, dila sanga mana intithawvengin an chhar a, a neitu hnenah hian an pe let leh a, ani pawh a lawm hle.

Dana Scott Laughlin-i chuan a zungbun hi kum 1969-a high school a chhuah hnu lawkah Lake Berryessa-a tui a chennaah a kutzungtang atanga chhuakin tuiah a tla a, dil mawngah a tla ta niin a sawi.

A chhangtute nupa hian Laughlin-a fapa bepawpin Lake Berryessa-a sangha an mannaa zungbun an chhar chu a neitu dik tak hnena pek kir leh an duh tih an hrilh.

Laughlin-i hi dil leh a zungbun chhartute awmna atanga mek 2,000 chuanga hla, Foley, Alabama daihah awm a ni a; mahse, thlalak an thawnte ngun taka a en chuan ama ta ngei a ni tih a finfiah thei ta a. A zungbunah hian ama hming pawh a chuang a, an sikul hming pawh a lo la chuang kalh a ni.

“Ka lawm a, ka zingbun kha kum tam tak hnuah ka chhar leh ang tih ka ring pha lo va. Ka pasal pawhin keimah tluk zetin mak a ti a ni,” tiin Laughlin-i chuan WPMI-TV hnenah a sawi.

A zungbun a ni tih a tihchian hnuah Laughlin-i hi thawn nghal a ni a, UPS-in an phur mek a ni.

Cambridge Fire Department, Massachusetts chuan July thla tir khan Charles River-a lunghlu zungbun bo pawh Charlesgate Yacht Club nen an lo hai chiam tawh a, an hmu rih lo thung.