California-a nu pakhat chuan Idaho daih atanga phone call dangin a thu hriat chuan a barakhaih hle a, kum kua zet kal tawha a zawhte bo tawh chu an hmuh thu an hrilh a, tunah chuan neitu thar hnuaiah a awm tawh thung.

Clovis-a cheng, Susan Moore-i hian a zawhte, Harriet tia a hming a sak chu kum kua kal ta khan a bo va, a pasal, Brian Ellison nen chuan tuten emaw an tihhlumsak daih tawhah an ngai hmiah tawh a ni.

Moore-i hian Harriet hi a hma kum thumah zawhte vulhtute hnen atanga a lak a ni nghe nghe.

“A bo tirh kha chuan hrehawm ka ti hle a ni,” tiin The Washington Post hnenah a sawi a. “He zawhte nen hian inkungkaihna nghet tak kan nei tawh a ni,” a ti.

Moore-i chuan September 19-a Kootenai Humane Society, Hayden, Idaho atanga phone a dawng nawlh mai chu mak pawh a ti hle tih a sawi.

A betu hian Harriet chu Clovis atanga mel 1,000 chuanga hla, Hayden-ah khawlaiah an hmuh thu a hrilh ta mai a. Zawhtea microchip an dah atanga chhuiin Moore-i chu an bepawp thei ta a ni.

Moore-i hian a zawhte bo an hmuh leh rual chuan Idaho-a cheng a nutapa chu la tura tirh mai a tum hman a; mahse, Harriet chuan a bo chhungin chhungkaw thar neiin amah pawh a hriat tawh loh pawh a hlau deuh.

Hei vang hian zawhte enkawlna hmuna thawk pakhat, kum 75 mi, Maureen Wright-i chuan Moore-i hnenah hian Harriet-i enkawl chu a dil ta a ni.

Wright-i hian a zawhte thar chu a uite nen an inkawmngeih a, Harriet-i hian Moore-i hnen atanga malsawmna a dawn chu a la chhawm zel nia a hriat thu a sawi.

“A nalh a, a nungchang a tha a, duat a nuam em em a ni,” a ti a. “A dam chhung chu ka enkawl tawh dawn a ni,” a ti bawk.