Bazarpui te, car leh lift te pawh, miin nau an lo hring tawh thin a, tun tuma mi erawh a nu hian a band ngaihsan concert en loh a hlau hle ni ngei tur a ni a; Metallica concert a en laiin a hring hmiah mai!

Luan Figueiró tia a hming an sak tak naute hi Metallica-in Brazil chhim lama Parana state-a Couto Pereira stadium-a concert an neih laia a nuin a hrin a ni.

He thil hi May thla tir lama thleng tawh kha niin Metallica pawh hian an concert-na hmuna nau chhar hi Instagram-a zuitu maktaduai 8.2 an neihte hmuh theih turin story-ah an hmang nghe nghe.

Naute nu, Joice M Figueiró-i hian kum thum kal ta khan concert enna tur ticket hi a lei lawk tawh a, concert an neih meuh hi chuan nau chawlhkar 39 a pai tawh a, en ngei a duh si avangin a bika an siam hmun (special area)-ah thuin a en a ni.

Concert tawp hmaa hla thum emaw chauh sak tur an neih tawh tihin nau a vai ta mai a, ambulance an kohsak a; mahse, phurh chhuah hman pawh a ni ta chuang lo a ni.

Figueiró-i hian Portuguese leh saptawngin Instagram-ah hian a fapa chu khelmuala a band ngainat takin an hla hit em em, ‘Enter Sandman’ an sak laiin a hring tih a tar lang.

A naute hmingah hian a tirah chuan Metallica frontman James Hetfield leh drummer Lars Ulrich hming chawiin James Ulrich a ti hman tep niin fiamthuin a sawi bawk.

Kum 2019 khan nu pakhat chuan Liverpool khawpuia Anfield Stadium-a concert an neih laiin naute hmeichhia a lo hring tawh bawk a, a hmingah Dolly Pink tih an phuah ta nghe nghe.