Mi hnena saruaka awm zirtirna atan tia sum tuak paha saruaka thirsakawr khalha tlan kual pa pakhat chu man a ni.

Stuart Gilmour-a hi social media-ah chuan ‘Naked Cyclist’ tiin a indah a, Sky News hnenah Pathianni kalta khan Colwyn Bay, North Wales-ah an man niin a hrilh.

Kum 44 mi hi North Wales tuipui kama Prestatyn atanga inkhalh chhuak niin saruaka khawsate tana huaihawt, naturist beach day chu rilru lama harsatna nei pawl, Mind tana sum tuakin a tlawh niin a sawi bawk.

Prestatyn pana a let leh lam chu mel 15 vel a kal leh hnuah police-in an lo tiding ta niin Gilmour-a hian a sawi.

“Saruaka awm chi (naturist) ka nih thu ka hrilh,” a ti (‘naturist’ an tih hi mipat hmeichhiatna hawi lam ni lova engmah inbel lova awm duh leh awm ching mihring sawina a ni).

“Charity atana ti ka nih thu leh COP (College of Policing) law on naturism pawh ka neih thu ka hrilh a. Duty sergeant an bia a, ani hian min man turin a ti ta a ni,” a ti.

“An car hnungah min dah a, St Asaph-a police station min panpui ta a ni,” a ti bawk.

Manchester-a cheng, Gilmour-a hi kum 10 chuang zet naturist lo ni tawh niin police-in an kawl lai hian a chungah an tha hle tih a sawi a. Social media leh CCTV-a a tlan kual lai an ensak a, engmah dan pela tih a neih an hmuhsak lo tih a sawi bawk.

Mind tana thirsakawr khalha sum a tuak rual hian mi hnena naturist nih a zirtir pah tih a sawi bawk.