Ramhnuaia tla ngei ngei tura ngaih, sa hring ei chi lehnghal, sakei hi mihring vulh chi pawh a ni meuh lo va; mahse, khawvel hmun dang ang bawkin Mexico hmar lamah hian vulh an ching a, an vulh mai a ni lo, an la inruksak lehzel bawk.

Mexico hmar lama tharum thawhna a thlen nasatna thin state, Sonora-a prosecutor-te chuan Thawhlehni khan Bengal tiger puitling tawh, Baluma chu ruk bo a nih thu leh zawn mek a nih thu an puang.

Baluma hi kum ngaa upa, a pa a ni a. Thawhtanni khan state khawpui, Hermosillo atangin ruk bo a ni.

A neitute hian ramsa lian hi vulh thei turin sawrkar atangin phalna engkim dan angin an nei vek niin prosecutor-te chuan an sawi.

Prosecutor-te chuan a zawnna atan zawhte lian hi a bawm (cage)-ah ui nena an bawk dun lai thlalak an thehdarh a, a hmu apiangin police hriattir turin an ngen.

Mexico-ah hian sakei vulh an ching a, buai phahna pawh a thleng fo va, a bikin a neituten an thunun zawh loh tum a thlen chuan buai a zual bik a. A chang chuan ruihhlo tawlhtute inah hmuh leh nawlh chang pawh a awm fo thin.