Princess Diana-i kawrlum, beram lem dum intlar that kara a var pakhat lo awm vena chu Sotheby’s-in New York-a an lilamnaah $ maktaduai 1.14 (£9,20,000) zetin an hralh.

A lei duhtute August 31 khan chhan theihna hun hawn a ni a, chhan theihna hun tawp dawn thlengin $2,00,000 (£1,61,000) hnuai lam chauhva chhan a la ni thung.

Sotheby’s chuan ‘sheep jumper’ hi a $50,000 leh $80,000 (£40,300 leh £64,500) inkar vel chauhva hralh theih beisei a ni.

A leitu hi an puangzar lo bawk.

Kawrlum phiar mawlmang tak hi March thlaa thil hlui dah khawmna atanga hai chhuah kha a ni a, tun hnai kum eng emaw zat chhunga ‘People’s Princess’ tia an sawi mai thin, Diana-i thil hlui lilam zingah chuan an hralh to ber a ni.

Diana-i car, Ford Escort chu a teuh bertu niin kum 2022 khan $8,06,000 (£6,50,000)-in an hralh a ni.

Diana-i’n a lo inbel tawh, amethyst-bedecked Attallah Cross pawh January thla khan reality star Kim Kardashian-i hnen tuna kawrlum an hralhna hmun ngaa thena hmun khat vel, $2,03,000 (£1,63,800)-in lilamnaah an lo hralh tawh bawk.

A kawrlum an hralh taka beram langte hi lal chhungkuaa Diana-i dinhmun luah sawi fiahna nia ngah a ni.

Hetih lai hian fashion lam chanchin hriate chuan a hun tawp lamah phuba lakna thuam, ‘revenge dress’ inbel fo tho mah se Diana-i hian he a kawrlum a hak hi chu mi hnena thuchah (message) a sawina a nih an ring lo va, kum 1981-a Prince Charles-a nena an inneih hma lawka a hak kha niin an sawi.

Social-media a awm hma thil a ni a, chanchinbuten Warm & Wonderful kawrlum ha lai hi thlalakte hi an chhuah nasain amah ang deuh chi design pawh a chhuah nasat phah niin Sotheby’s chuan an sawi.

Pasal a neih hnu lawkah khan Buckingham Palace chuan Warm & Wonderful hnenah hian kawrlum chu a chhiat thu thlenin siam tha emaw, a thara thlak turin emaw an ngen a. Princess Diana-i hian a thara an thlakna chu kum 1983 khan polo khelhnaah a ha leh a ni.

Sotheby’s hian an lilamah hian Warm & Wonderful hnena lehkha an thawn leh a thara an thlak avanga lawmthu an sawina lehkha pawh an ti tel bawk.