ZALEN July 23, 2023 ; Kumin January atanga July thla laihawl thleng khan kum dang nena khaikhinin malaria leh dengue vei an tam ber kum Mizoramah a thleng mek a. Heng natna chi hnihte hi tui tling awm tamna hmunah a hlaur zel tih health department thawktute chuan an sawi.

ZALEN-in health department thawktute hnen atanga thu a sawn danin January, 2023 atanga June thla tawp thleng khan Mizoram mipui mi 1,43,324-te thisen endik atangin malaria kai mi 5,859 hmuh chhuah a ni tawh a, heng zinga 2,461 chu PV case niin a dang 3,398 hi PF case an ni.

Health department thawktute chuan kum dang nena khaikhinin January to June thla bikah Mizorama malaria kai hmuh chhuah san ber tum a ni mek tih ZALEN an hrilh a. Malaria kai an tam chhan hi malaria hri pu darhtu thosi laka invenna zawm that loh vang a ni tih an sawi a. Mi tam tak chuan an in leh lote thosi hlo hmanga kah an phal loh vang te, thosilen zar that loh vang leh invenna dang zawm that loh vang te a ni tih an sawi.

Kuminah hian malaria vanga thi nia hriat mi pathum an awm tawh a; mahse, hei hi thuneitu sang lamin an pawmpui (confirm) hnuah chauh malaria vanga thi nia puan theih a ni chauh dawn niin an sawi.

Malaria vang hian kum 2018-ah thi pathum, 2019-ah pariat, 2020-ah paruk, 2021-ah 10 leh 2022-ah 10 te an awm a ni.

Kum 2018 atanga 2023 inkara malaria leh dengue hri vei hmuhchhuah tawh dan

Kum    Malaria           Dengue    
2018    4296              68
2019    8543              131
2020    8349              67
2021    5637              83
2022    10229            1868
2023    5859 (June)   51 (upto July 19)