A mak tia sawi hial tur pawh a ni tawh zawk mai thei a, hetiang hi Mizo kut ropui leh ngaihhlut hlawh berah a thleng zen zen tawh hek lo — hei hian 'mak' tia sawi theih a ni letling tawh zawk tih a hril awm e. Kumin Chapchar Kut-a zai mi te chuan sap hla an sa lo khiah! Kumin Chapchar Kut-ah malzai mi 13 zet an awm a. Beat group pathumin Kut kharna hun hmangin anni te nen chuan zai 16 lai a awm tihna a ni a. Band leh malzai ang pawhin hranghlui chan chang tawh leh la hlui chiah lo chenin an inpawlh mawi tawk khawp mai. Chapchar Kut 2015 programme-a a lan dan chuan malzai lam hi a tir lamah Pathian hla sa ho hi an dah deuh bik niin a lang a. Youth Icon-ah pawh pahnihna lo ni tawh Lalduhsaki chu malzai ho zingah a hming a hmasa ber chu, Mizo Idol star Lalhlumawii chuan a rawn dawt leh chiah bawk a. Anni pahnih hnua zaiin hranghlui chan chang tawh — C. Luri chuan stage a rawn luah lum leh a. Thangromawia Thomte chuan rawn dawt velehin, Youth Icon atanga kan hriat lar Lallawmawma chu a rawn ding chhuak chhunzawm leh bawk. TBC Zaithanpuia pawh hi inhmelhriat chawp tir a ngai tawh awm lo e. A ni a zai zawha hming lang leh chu Chapchar Kut apiang tih theih deuhthawa Mizo traditional song thiam em em maia sa thin, hranghlui tia sawi theih tawh K.C. Runremsangi zai kan ngaithla leh a, Youth Icon hmasa ber Zoramchhani rawn ding chhuak velehin, a ni hi tunhnaia chanchin neuh neuh nei anga thuthang awm chu 'thu' ni loin 'tisa' in a dik lohzia a rawn dinchhuahpui pawh a tih theih awm e. A zaithiam ngaiin a la thiam reng a. RC-i hnuah Peter C. Lalrinmawia kan hmu leh a, R. Laithangpuii leh Lalfamkima bakah Lalbiakhlui Pachuau in an rawn zui ve leh a. Malzai tawp berah Vanlalsailova chuan 'Zoram Tang Fan Fan' hla hmangin mipui a rawn hui khawm hneh hle. He'ng malzai ho zawng zawngte hian Mizo hla vek an sa a, an fakawm thlawt. Malzai lam hi chuan beisei ang ngeiin Chapchar Kut hunah hian sap hla an rawn sak a rinawm loh ang ngeiin an rawn sa lo ngei a. Chutih rualin, beat group hun a lo thleng a, kum danga thil thleng zen zen lo an rawn thlen tir e! A hmasa berah Freddy's Nightmare an rawn ding chhuak a, hmanlai hla lar — Tu Zunzam Nge? — tih chu tunlai deuh leh Freddy's Nightmare music deuhin an rawn rem a, hei mi hnuah BM-a hla hit — I Dam Thin Mawi Ka Thianpa — hla an rawn chei mawi nalh lehpek hle a. Mipui an awm hle hle thei meuh lo. Albatross hun a thleng a, anni pawh hi sawi zui vak an ngai tawh awm lo e. Mipuiin an la lawm reng a, an lo zawm dual dual mai. A tawp khartu tur hi an duang fuh. Khamawm loh tawk vel tura programme an duang hi a hlawhtling viau! A tawp berah Triau Trackx an rawn zai a, mipui an lawm lutuk zetin anni pawh an lawm. Khati zat tam mipui hmaah an la perform lo hial ang tih theih tur khawpin mipuiin an bawr a, an zawm a, an lampui — hmuhnawm tak an ni. Kumina thil danglam tak thleng ta ber chu — he'ng malzai leh beat group te hian a hun leh hmun thliar hrang thiam a, Mizo te kut ngaihhlut ber a ni tih hriaa Mizo hla chauh hmanga an perform vek thei kha a ropui a, fak an phu a. Mi dang pawhin he 'record' hi rawn chhawm nung zel thei se a duhawm ngawt mai. Sap hla sak a thiang lo tihna pawh a ni bik chuang hek lo.