Aizawl: Union Minister of State for Finance Dr. Bhagwat Karad chuan Mamit District chu District hnufual a nihna atanga khai chhuah chu sawrkar laipui tum ber a nih thu a sawi.

Nimina Press mite nen an inkawmna ah Union Minister of State for Finance chuan hriselna, zirna leh hmasawnna ruhrel din kawnga hmalakna chu an ngaih pawimawh a nih thu a sawi a. Mamit District chhunga Health Sub-Centre 39 a Health Worker indaih lo lutukte, zirna in hrang hranga zirtirtu indaih lo leh zirtirtu awm miah lohna school awm te leh zirtirtu pakhat chauh awmna school awm te chu pawi a tih thu leh siamthat dan kawng zawn a nih tur thu a sawi.

Press mite zawhna chhangin Dr. Bgawat Karad chuan PMAY (U) (Housing for All) scheme hnuaia tanpuina dawngtu mi engemawzat in an in sak an chhunzawm thei lo leh pawisa an hmuh chhunzawm theih loh chungchang chu thil mai mai lo tak nia a hriat thu sawiin State sawrkar thuneitute a sawipui tur thu a sawi.

National Highway 44A hnathawh mek, sum tam tak sen ral tawhna, 31st December 2022 thleng chauh hnathawhna hun awm tawh, hnathawh tur la tam si chungchang pawh MJA memberte hian an sawipui a, he thil hi a ngaih pawimawh thu leh thuneitute a sawipui ngei tur thu MJA member te hi a hrilh a ni.