August 29, 2023; Mizoram police chuan thuchhuah siamin, Mamit Chhimveng naupang Lalremruata (11) rawng taka thattu R. Lalrinchhana (20) s/o R. Remlalnghaka chuan hur sualna kaihhnawiha a thah ngei niin a inpuang tih an tarlang.

Thuchhuah an siamah Mizoram police chuan, C. Lalrinchhana, Mamit hnen atangin Francis Lalremruata (11) s/o James Lalchhanhima, High School Veng, Mamit chu, August ni 17 atangin a chin hriat lohva a bo thu FIR an dawng tih an tarlang a, hnuchhui hna thawh nghal a nih thu an tarlang.

August ni 23, 2023, chawhma dar 11:30 ah naupang bo ruang chu Mamit dai, Mamit - Bawngva kawng hluiah luang leh thang karah hmuh a ni a, ruang hi saruak veka awmin, a lo chhe tan tawh a ni. A ruang awm dan a rinhlelhawm avangin, a zir chiang turin Aizawl atangin FSL expert te chah thlak niin post mortem neih a ni.

Mamit PS ah thubuai ziah luh niin, uluk takin chhui zui nghal a ni a, August ni 25, 2023 ah R. Lalrinchhana High School Veng, Mamit chu August ni 17, 2023 zan khan Nghaka Motor Works, Mamit chhungah hur sualna kaihhnawiha a thah ngei thu inpuangin, evidence leh thil dangte pawh a inpuanna behchhanin man a, lakkhawm a ni.

Court a hruai a nih hnuah R. Lalrinchhana hi Central Jail, Aizawl ah August ni 26, 2023 khan dah luh a ni.