Man United chuan tun nipui transfer chhung ngei hian Barcelona atangin Frenkie de Jong lakluh ngei an duh tih chu an zep hran lo. Daily Express sawi danin Jong bakah hian Barcelona player tho Memphis Depay pawh an target niin an sawi. 

Erik ten Hag-a'n Old Trafford a rawn luh tirh atang khan an forward tihchak chu a rawn ngai pawimawh nghal a, chumi tur chuan Dutch mi  Frenkie de Jong, kum 28 a upa chu rawn hmutai nghalin dinglama tlan turin a duh a ni. Hetih rual hian Memphis pawhin a mit a la hle bawk. 

Barcelona hian khawvel striker tha ber pawl Robert Lewandowski chu Bayern Munich atangin an lalut thar a, a ni bakah hian Pierre-Emerick Aubameyang an neih bawk a vangin Memphis atan pawh hmun chan loh mai a hlauhawm a, a remchan laia chhuahsan mai pawh a hnial lo maithei a ni.

Memphis hi player duhawm tak a ni mek a, tun kar tir lama Barcelona-in si ruk zeta Inter Miami an sawp tum pawh khan goal a thun ve nghe nghe. Barcelona tan game 37 a khelh tawhah goal 13 a thun tawh bakah assist pahnih a nei tawh.