Old Trafford a zawm hnua a vawi 4 nan, David de Gea chu Red Devils player ten Player of the Year atan an thlang. Kum 31-a upa De Gea hi 2021/22 season liam ta chhung khan Manchester United tan a khel tha hle a, Premier League matche 38 an khelhah club tan goalkeeper niin a ding tluan. 

Heti chung hian, clean sheet erawh tum 8 chiah a nei thung a, 2018/19 season hnua a neih tlem ber ala ni zui. Goal hi chhuah tam angin lang mahse De Gea hian season liam ta chhung khan vawi tam an team a chhandam thung a, a chetthat zar zovin United defence pherh tak pawhin an thang mawi phah nia hriat a ni. .

Red Devils hi Premier League season liam taah khan parukna an ni phak hram a, goal an thun tlem em em bawk. Season liam ta kha tun hnaia an goal thun tlem record niin goal 57 chiah an khung thei. 

An defence chhiat zarah De Gea hian a goal ven thiam zia a lan tir theih phah hlauh thung a, a khel tha thei tih lanna pakhat chu, Premier League bikah tum sarih zet Man of the Match award a dawng thei a ni. Southampton goalkeeper Fraser Forster-a'n February 2016-a Premier League Player of the Month a dawn hnua keeper zinga hetiang award dawng leh thei hmasa ber niin, kumin January thla khan Premier League Player of the Month atan than a ni.

November, December 2021 leh January 2022 khan Spanish international hi Manchester United Player of the Month atan thla thum chhung a zawnin an thlang. De Gea hian nikum nipui lai khan Old Trafford hi a chhuahsan hman tep a, contract hmui tak sihhmuhin an char bet thei a, kum 25 mi Dean Henderson pawhin luah lan tumin bei ngial thin mahse a nek chhuak zo rih lo. Spaniard hian season tha tak hmangin award dawng nual mah se an boss thar Erik ten Hag hnuaiah hian number one a ni reng thei a ngem?