ZALEN August 16, 2023 : LPS Vision-in July 29, 2023-a Manipur Zohnahthlakte puihna tura Live program buatsaiha vehbur an khawn tlingkhawm Cheng nuai 15 atanga tanpuina an hmuh chu LPS Crew te chuan frontline duty hrang hrang te an duty-na hmunah kal chilhin an hlan.

Mipuiin tanpuina sum an thawh khawm te sem tur hian LPS vision-a thawktu mi 4 te chu Manipur-ah hian an kal a, sum tling khawm atanga lei - Buhfai, Dal, Tel, Neutrela, Sahbawn leh an mamawh dangte bakah sum fai te chu August ni 11 atanga ni 14 chhung khan Zohnahthlak khaw hrang hrang ah an sem chhuak a ni.

Tanpuina hi centre hrang hrang - Khousabung, Laika, Mualsau, Mualngat, P. Jeljang, Gothal, Phualjang, Mualhawih, Kangvai, Sajang, Tuiring phaisen, Langza, Tiger Camp, Old Dampi, Kanan leh Leisen Area Centre-ah te sem chhuah a ni a, Centre hian khaw 6 vel a huam zel a, a khua ang zawnga LPS kaltlanga tanpuina dawng tu hi khaw 90 chuang an ni.

Heng bakah hian Manipur-a Zohnathlak pawl hrang hrang te kutah tanpuina sum fai hi hlan a ni bawk. LPS-in khaw hrang hrang a tlawhte hi Meitei khaw hnaih tak tak te a ni a, Inkahna thleng tamna te an ni.