ZALEN August 20, 2023 : Manipur tual chhung buaina avanga sahimna zawnga Mizorama raltlan lut an tlem tawh hle a. Mizorama chhungte belh tur nei lo raltlante chu RAY Falkland vengah enkawl mek an ni.

ZALEN thudawn danin Manipur buaina avanga raltlante hi a huhoa lut ang kha an awm tawh lo a, hetih lai hian damlo inenkawl tur te, phai lam pan tum leh eng emaw avanga lo chhukte erawh an awm zeuh zeuh niin an sawi.

Chhinchhiahna hnuhnung berah chuan Manipur buaina avanga sahimna zawnga Mizoram lut hi mi 12,608 an awm a. Raltlan awm tamna ber, Kolasib district-ah 4443, Aizawlah 4,272, Saitualah 2,951, Champhaiah 407, Mamitah 164, Khawzawlah 116, Serchhipah 99, Lawngtlaiah 73, Lungleiah 44, Siaha-ah 31 leh Hnahthial district-ah pariat an awm mek.

Central YMA-in Manipur raltlante chawlh lailawkna tur hmun, transit centre an siam pawh August 12, 2023 khan khar a ni a, an enkawl mekte hi RAY, Falkland-ah sawn luh an ni.

YMA transit camp-ah hian a vaiin mi 800 vel enkawl tawh an ni a, transit camp hi tihtawp ni mah se harsatna tawk, Mizoram pante erawh YMA hian an lo buaipui zel thung a ni.

Mizoram sawrkarin raltlan a dahkhawmna, RAY, Falkland-ah hian raltlante chu room 63-ah dah niin chhungkua emaw, innel/inkawmngeih tlang deuhte dah khawm an ni. 

Mizorama raltlan zingah Manipur lama let tlem an awm a; mahse, thenkhat chu let ngaihna awm tawh lo an awm bawk a. Heng mite hi an in leh lo an hal chhiatsak leh Meitei hovin an luahsak te an ni a. Raltlan lette hi Lamka leh a chhehvela mite nia thudawn a ni.