Chawlhkar thum liam ta vel atanga chi leh chi inkara buaina avanga tharum thawhna a thlenna, Manipur-ah chuan ni tin mamawh man a sang tawh hle a, state pawn atanga mamawh lak luh pawh a buai phah a, thil tam tam chu a pangngai let thawk thawka hralh a ni hlawm.

Tui leh lui hmanga bungraw lak luh theih lohna, hmarchhak state-ah hian ni tin mamawh ang chi - buhfai, alu, purunsen leh artui bakah LPG cylinder leh petrol te chu sorkarin a man bi a thliah aia sang fe veka hralh a ni.

“A hma chuan kg 50-a rit superfine rice bag khat chu Rs. 900 man a nih thin laiin tunah chuan Rs. 1,800-ah a chho tawh a. Alu leh purunsen pawh Rs. 20 leh 30 inkarin a to vek tawh a. A tlangpuiin state pawn atanga lak luh ngai ang chi ni tin mamawh man chu a sang em em vek a ni,” tiin Imphal West district-a sorkar sikula zirtir hna thawk, Manglembi Chanam chuan a sawi.

Imphal West district hmun thenkhatah chuan LPG cylinder-te pawh a black market-a lei a ngai a, Rs. 1,800 man zet niin petrol pawh litre-ah Rs. 170-a lei a ngai niin a sawi.

“Artui man pawh a to chak hle a, a hmaa plate khat (30 awmna) Rs. 180 vel ni thin chu Rs. 300 a ni tawh a. Venhim hna thawktuten an venna hnuaia ni tin mamawh phur lirthei an luhpui a nih loh chuan a la to belh zel a rinawm a. Alu pawh venhim hna thawktute an lo luh hma kha chuan kg-ah Rs. 100-a lei a ngai a ni,” tiin Chanam chuan a sawi.

Imphal Valley-a truck-te chu kawngpui dan bakah Meitei-ten Scheduled Tribe (ST) status neih an phutna duh lohna lantira May 3-a ‘Tribal Solidarity March’ avanga tlangram district-a buaina chhuak avangin an lut thei lo.

“Hetiang boruak hi a nih avangin state pumah ni tin mamawh lak luh a buai vek a, NH 37 zawha chet vel hi a khirh hle a ni,” tiin defence thupuangtu chuan a sawi.

May 15 atang khan NH 37-a truck kal hi chhunzawm leh a ni tawh a, venhim hna thawktuten boruak a pangngai theih nan theihtawp an chhuah tih a sawi bawk.

Mi 70 chuang thihna, Meitei leh Kuki inkar buaina a chhuah ve lohna district-ah pawh ni tin mamawh hi a vângin a to phah ve tho.

Tamenglong district khawpuia eichawp dawr leh thingpui dawr neitu, kum 41 mi, Rebecca Gangmei-i chuan, “Kan district-ah tharum thawhna thleng ve lo mah se ni tin mamawh, a bikin buhfai man a to phah ve tho va. Sa tih loh hi chu tual chhunga mi deuh vek kan rin ni mah se a to vek tho a ni,” a ti.

Ukhrul district-a sorkar college-a assistant professor thawk lai, Pamchuila Kashung chuan Nagaland nena inri maiah awmin mamawh a lam zung zung theih bik avangin a vannei hle tih a sawi ve thung.

“Chuti chung pawh chuan thil thenkhat man hi chu a to hle a, a bikin bufai man hi a sang chak zual,” a ti.

Mi thenkhat chuan vaihlo kaihhnawih thil pawh a to sawt hle niin an sawi bawk.

Consumer affairs department-a thuneitu chuan sorkarin a khât tawkin thil man hi a bithliah zel tih a sawi a, a man bituk aia sanga thil hralh chu hrem theih an nih thu a sawi bawk.

State sorkar hian tharum thawhna a thlen hnu lawkah khan wholesale leh retail-a ei tur lam chi 18 hralhna tur man bithliah thar a tichhuak nghe nghe.

Tar lan tawh thin angin Manipur-a buaina hi May 3 atanga intan kha niin reserve forest ram chhunga cheng Kuki-te hnawh chhuah tumna atanga intan a ni a. Boruak lian zelin nasa takin a alh ta a ni.

Manipur-ah hian Meitei hi mihring cheng zinga a tam ber niin 53% chuang an ni a, Imphal Valley-ah an cheng deuh ber a. Tribal an tih, Naga leh Kuki te chu 40% vel niin tlangram district hrang hrangah an cheng deuh ber thung.

Chi leh chi inkara buaina chhuakah hian mi 70 chuang thiin thil tam tak tihchhiat a ni a. Boruak tidai turin sipai leh para-military mi 10,000 vel koh luh an ni.