Manipur-a tribal pawl hrang hrang inzawm khawmna, Indigenous Tribal Leaders’ Forum (ITLF) aiawhte chuan a sawm ang leh Mizoram Chief Minister Zoramthanga thurawn angin Nilaini khan Delhi-ah Union Home Minister Amit Shah an be ta.

Inrinni khan Shah hian ITLF hruaitute hi Delhi-ah inbiakna neihpui a duh thu a hriattir a, tribal hruaituten a chhan dan tur ngaihtuaha an thutkhawm hnu leh Mizoram chief minister thurawn an lak hnuah inbiak hi an remti a ni.

ITLF hian union home minister-in a sawmna chungchangah  hian venthawn ruk an nei a, Chief Minister Zoramthanga hian, “Home minister meuhin a rawn sawm cheu chuan kal ngei a tha e, kal loh ngawt chu a tha lo vang; hmaichhanah ngei engkim sawipuina hun tha a ni,” tiin thurawn a pe a ni.

Manipur-a tribal hruaitute hian Zoramthanga thurawn angin Pathianni han Delhi pan turin Manipur an chhuahsan nghal a ni.

ITLF aiawh mi palite hian Churachandpur atanga hnai tê, km 80 vel chauh, Imphal pan mai lovin lirtheiin km 350 chuanga hla, Aizawl an pan a, heta tang hian Delhi an pan leh a ni.

“Inbiakna kimchang chu puan thuai a ni ang,” tiin ITLF thupuangtu, Ginza Vualzong chuan a sawi a, home ministry pawhin inbiakna chungchangah hian thuthar an la nei rih lo.

Tribal hruaitute hian Intelligence Bureau (IB) Director Tapan Deka pawh Thawhlehni zan khan an kawm hmasa bawk.

Inrinni khan Kuki-Zomi hian May thla tir atanga Meitei nena an intihbuaina chhuaka an mi thite a hlawma vuina hun hman an tum a, buaina dang chhuah palh venthawnna avangin home ministry hian a hun sawn turin a ngen a, hemi tum pawh hian Mizoram chief minister rawnin ani thurawn ang hian sawn a lo ni tawh bawk nia sawi a ni.

Shah hian May chawlhkar tawp berah khan intibuai mek pahnih, Kuki leh Meitei te hi an state a tlawh tumin a hrangin a lo kawm ve ve tawh a, buaina chawk chhuak zawnga awm tawh lo turin ngen mah se tun thlengin tharum thawhna a la awm reng.

Delhi-a Nilainia inbiak a nih lai hma lawk, Inrinni pawh khan hmarchhak state-ah hian hmun hnihah inthahna thlengin venhim hna thawktu pawl hnih inkarah pawh khi a awm zui phah mek bawk.

Hmarchhak state-ah hian tlangram district hrang hranga cheng, tribal Kuki leh Imphal phaikuama cheng Meitei intihbuaina hian thla thum chuang a awh tawh.

May 3-a Kuki chen tamna, Churachandpur-a tribal-ten Meitei-in scheduled tribe (ST) status neih an dilna duh lohna lantira kawng zawh liantham an huaihawt atangin buaina hi a chhuak a. State pum awh nghalin mi sang tam tak baihvaiin an awm phah mek a, chenna in leh sakhaw hmunte an inhalsak a. Thla thum liam ta chhung hian mi 170 vel thi an awm tawh bawk.