DOWNLOAD OUR APP

Read latest news on your phone
play-store app-store
app-store
MANIPUR BUAINA: Gandhi-a’n BJP a bei na, India thattu-ah a puh
Ram chhung and Ram pawn
Aug 09, 2023
Indian eptu hruaitu, Rahul Gandhi chuan Prime Minister Narendra Modi-a chu Manipur buainaah ‘Mother India a that’ tiin a sawi.
 
“Manipur-ah hian India an that a. An politics hian Manipur-ah India a tihlum a ni,” tiin Gandhi-a hian parliament rorelna inah rorel lai, BJP chu na takin a bei.
 
Gandhi-a hi an party leh eptu dangten Modi-a kaihhruai sorkar rintawk lohna (no-confidence) motion an put luh sawihonaah dingin sorkar hi an chet danah a sawisel nasa hle.
 
Modi-a sorkar rintawk lohna hi sawiho a nih hnuah Ningani hian vote lak a ni ang.
 
BJP leh a tanrualpuite hian parliament-ah hian member an ngah zawk avangin Modi-a sorkar hi a tlu dawn chuang lo va; mahse, eptu hruaitute hian tun laia chi leh chi inkara buaina chhuah mekna, Manipur chungchangah Modi-a hi tawng tura nawr nan motion hi an pu lut a ni.
 
May thla tir atanga hmarchhak state-a a mi cheng tam ber, Meitei leh a tlem zawk, tribal Kuki te inkara buaina chhuak mekah hian mi 150 chuang thi tawhin mi sang tam tak baihvaiin an awm tawh a. Modi-a hi he buainaah hian a ngawi tlat a, hmeichhe pahnih saruaka khawlaia kalpui video, khawvelin a dem rawn a darh hnuah chauh aw a chhuah a ni.
 
Nilainia rorel inkhawmah hian Gandhi-a chuan Modi-a tan chuan Manipur hi ‘a pawimawh lo’ niin a sawi a. “Kan prime minister hian tlawh pawh a la tlawh lo va, a tan chuan India ram a ni ve tlat lo a ni,” a ti.
 
Congress party hruaitu chuan, “Manipur-ah hian India an that a. An politics hian Manipur chauh an tihlum lo va, Manipur pawh an tihlum a. Manipur-ah hian India an that a ni,” a ti.
 
Gandhi-a thu sawi hi BJP hruaitu chuan nasa takin an dem a, India hming chu tenau takah a chhuah niin an puh.
 
“India pawh i ni lo, India hi ei rukna tur ringawt a ni lo. India hi hlutnaa innghat a ni a, inthlahchhawn lam a ni lo,” BJP MP, Union Minister Smriti Irani chuan a chhang let a. Inthlahchhawn a sawi hi Nehru-Gandhi chhungkua, India-a inthlahchhawnga politics-a hnuhma nei thui ber a sawina a ni a. Anni chhungkua hi kum 1947-a India a indan hnu atanga thuneihna chang rei tawh ber an ni.
 
Gandhi-a hi mi tihhmingchhiat thubuaia lung in a tan tur tihkhawtlaisak a nih avanga parliament-a member a nih thar leh hnua thu a sawi hmasak ber a ni.
 
March thlaa kum hnih lung in tang tura hrem a nih rual khan MP a nihna hi a hloh nghal a. Supreme Court-in hremna hi Zirtawpni kaltaa a tihkhawtlaisak hnuah Thawhtanni khan member atan dah let leh chiah a ni.
 
Thawhtanniah khan Mahatma Gandhi lima zahna a hlan hnuah parliament building hi a tlawh a, eptu hruaitu dang tam takin an lo lawm.
 
Tun tuma parliament fur thutkhawm kal mek hi July 20 atanga tan tawh kha niin eptu hruaituten Modi-a’n Manipur buaina chungchangah aw chhuah ngei se an duh avangin ro rel mumal theih a la ni meuh lo.
 
Tun tum hi kum 2014-a Modi-a a sorkar hnua a laka no-confidence motion a luh vawi hnihna a ni a. Kum 2018 khan MP pakhatin Andhra Pradesh hnena special status pek tur chungchangah a lo pu lut tawh a, darkar 12 sawiho a nih hnuah Modi-a hian hnehna a chang.
 
No-confidence motion sawiho leh mek hi tun hnaia eptu party 26-ten thawhhona an din thar, INDIA tan an inpumkhatna lantirna remchang a ni mek a. July thlaa indin chauh kha niin nakum ram inthlanpuiah Modi-a kaihhruai BJP paih thlak an tum.

Latest News & Chhiar Hlawh