Manipur sorkar chuan sorkar buatsaih ni lova India Independence Day lawmnaa silai lek chhuah chungchangah Churachandpur deputy commissioner leh superintendent of police hnenah thil awm dan sawi fiaha report pe turin a ti.

Zirtawpni khan State Security Advisor Kuldiep Singh-a chuan parade-naa ralthuam pho lante hi hriat chian a nih hnuah dan anga hma lak a ni ang tih a sawi.

“DC leh SP hnen atangin August 15-a Churachandpur-a sorkar buatsaih ni lo Independence Day parade-a ralthuam an lek chhuak chu report pe turin tih an ni a. Report a lo thlen hunah heng tilangtute lakah hian dan anga hma lak a ni ang,” tiin thuthar lakhawmtuten an kawmnaah a sawi.

Singh-a hian silai bo 1,250 chuang hmuh chhuah a ni tawh tih a sawi a. Thla thum liam taa chi leh chi inkara buaina a chhuah hnuah state police ralthuam dahna hmun atangin ralthuam ruk bo a tam hle.

“Ngun takin zawn hna thawh zel a ni a, ni tin ralthuam hi hmuh belh zel a ni,” a ti.

Chief Minister N Biren Singh chuan a sorkar chuan parade-naa ralthuam ken chhuah kha engtin nge a thlen theih tih a chhui mek tih a sawi a, “Kha thil kha sorkarin Independence Day parade a buatsaih pawh a ni lo va, anmahnia a hrana an lo huaihawt a ni,” a ti.

Meitei-ten for Scheduled Tribe (ST) status neih an phutna duh lohna lantir nana May 3-a Manipur tlangram district-a ‘Tribal Solidarity March’ an buatsaih a atangin Manipur-ah hian buaina a chhuak tan.

Manipur-ah hian mi cheng zinga 53% chuang zet chu Meitei an ni a, Imphal Valley-ah an cheng deuh ber a. Tribal an tih, Naga leh Kuki te 40% chuang awm ve bawkin tlangram district-ah an cheng deuh ber a ni.