Chi leh chi inkara buaina nasa tak chhuahna, Manipur-ah Zirtawpni khan tharum thawhna thleng thar lehin mi pahnih an thi a, mi dang 20 chuangin hliam an tuar bawk.

Sorkar chuan Tengnoupal district-a Pallel khuaah zing atangin tual chhung mi ralthuam kengte leh venhim hna thawktute nasa takin an inkap tih a sawi.

A hmuna awmte chuan ambulance tlan lutin hliam tuarte damdawi in lamah an phur chhuak hlawm niin an sawi a. Hliam zingah hian venhim hna thawktute pawh an tel niin an sawi.

Thuneitute chuan zing darh 6:00 vel atangin silai a puak tan niin an sawi a, reh lai awm mang lovin a puak deuh reng niin an sawi.

Ni hnih liam ta, Nilaini maiah khan Bishnupur district-a Phougakchao Ikhai-ah mi sang tam tak pung khawmin sipaiten an dalna (army barricade) chu paltlanga Torbung-a an in leh lo kalsan taka let leh tumin an lo innawr tawh.

“Heng lai hmunah hian boruak a tang hle a, venhim hna thawka awm -RAF, Assam Rifles leh Manipur Police te chuan thunun nan mittui tlakna hlo hmangin an kap,” tiin thuneitute chuan news agency PTI an hrilh.

He thil thlen hma ni, Thawhlehniah khan buaina chhuak tur ven nan phai district pangaah curfew puan lawk a lo ni tawh bawk niin PTI chuan a tar lang.

Manipur High Court-in state sorkar hnena Metei-te chu Scheduled Tribe status pek mai chi nia rawtna a thlen hnua buaina chhuakah hian mi 180 chuang thi tawhin mi sang tel baihvaiin an awm phah tawh.

May 3 khan tlangram district-a cheng tribal-te chuan court thupek duh lohna lantir nan ‘Tribal Solidarity March’ an huaihawt a. He kawng zawh atang hian Kuki leh Meitei inkarah Churanchandpur leh Bishnupur district inrina velah tharum thawhna chhuak tanin a la reh ta lo a ni.

Venhim hna thawktute chuan Meitei khua leh Kuki-te chenna inhnaihah ‘buffer zone’ tia vuahin venhimna an tikhauh lehzual a, hei hi hnam hnihte an intihbuai leh mai loh nana an tih a ni.

Meitei hi Manipur-a cheng zinga a zahve aia tam, 53% chuang an ni a, Imphal phaizawlah an cheng deuh ber a. Tribal hi Naga leh Kuki ni tlangpuiin 40% vel an ni a, tlangram district-ah an cheng ve thung a ni.