Manipur police chuan tharum thawhna thlen nasatna district atanga sawn chhuah an nih hnu lawkah Assam Rifles lakah thubuai an ziak lut nghal.

Police hian central paramilitary force lakah thubuai an siam hi Inrinni kal taa Bishnupur district-a thil thleng kaihhnawih kha niin mi pathum thattu nia an hriatte an umzui laiin an man theih loh nan hma an lo la niin an puh.

Union home ministry hnuaia awm, Assam Rifles hian an laka thubuai ziah luh chungchangah hian engmah an la sawi lo.

FIR-a a inziah luh dan copy darhah chuan thubuai hi August 5-a ziah luh kha a ni a, Manipur police leh Assam Rifles sipaite inhnial lai video social media-a a darh hnu lawka ziah a ni.

Video darhah hian Manipur police commando-te hian Assam Rifles sipaite chu an beihpui thlaknaah inrawlhin hel man tuma an beih laiin a tibuai zawngin an lo che niin an puh a, an inhnial nasa hle.

Thla thum kal taa buaina a chhuah atang khan Manipur-ah hian a hma pawhin Assam Rifles leh Manipur police commando-te hi an lo inbakkaih fo tawh a, social media hrang hrangah a lo darh nual tawh bawk.

“Pholjang kawngpui hrul, Kwarka Ward 8-a Kutub Wali Masjid kan thlenin state police team hi lo tihdin kan ni a, 9 Assam Rifles-ten Kwakta Pholjang kawngah kaltlang theih loh nan an Casper lirthei an lo hung a, dan anga kan tih tur kan tihna tur an lo tibuai a ni,” tiin Bishnupur district-a Phougakchao Ikhai Police Station-a officer in charge chuan FIR a thehluhah a ziak a ni.

Thawhtanniah khan Meitei hmeichhe pawl chak tak, Meira Paibi chuan Manipur phai district pangaa Assam Rifles dah an nih duh lohna an lo lantir tawh a, paramilitary force hi Meitei mite lakah ‘rawng takin an che’ niin an sawi.

Hmeichhe tam tak pungkhawmin ni lengin placard leh banner lek chhuakin district panga - Imphal East, Imphal West, Thoubal, Bishnupur leh Kakching atanga Assam Rifles lak chhuah an phutna an lantir.

Thawhlehni chawhmaah khan Assam Rifles-te hi Bishnupur district-a checkpoint pawimawh tak, Moirang Lamkhai-a an duty-na hmun atanga lak chhuah niin a thlaktu turin CRPF dah luh an ni zui ta nghe nghe.