Aizawl August 18, 2023 : Rajya Sabha MP K. Vanlalvena chuan Lok Sabha-ah thusawina chan a hrsat dan leh Rajya Sabha-a hun chan a awlsam thu a sawi a, Manipur buaina chu eptu party ten BJP sawrkar paihna remchangah hman an tum, tribal te an hmangaih vang a ni lo, BJP sawrkar tihmualpho chiah an tum, a ti. 

Vawiina Hnam Run-a thu a sawinaah K. Vena chuan Rajya Sabha-a thusawi a harsat loh thu sawiin, “RS-ah chuan member kan tlem a, thusawi tum ngar ngar chuan hun a chan mai theih. LS chu mipui thlan, leadership nei tha an ni a, hun chan a harsa,” a ti a. “RS-ah Chairman phalna-in vawi 14 leh phalna lovin vawi 2 thu ka sawi tawh," a ti.

Vena chuan Manipur buaina hi eptu parliament member-te chuan Lok Sabha inthlan lo awm turah BJP sawrkar paih nan remchang an la tih sawiin, “Kan unaute an tan vang a ni lo, Rahul Gandhi pawhin a tan chuang lo. BJP sawrkar tihmualpho hrim hrim an tum. Keini erawh chuan kan unaute tawrh chen tawrh kan huam vang a ni. Anni chuan tribal thlavang an hauh lova BJP sawrkar tihmualpho chiah an tum,” a ti.

Manipur thil thlengah MNF ropuizia a lang dawn chauh tih sawiin, “Tuna kan unaute luah ram saw MNF-in Mizorama rinluh thin a ni. Amaherawhchu, anmahni lamin kan lama beh an chak lo. Tunah erawh chuan kan hnena beh an chak tak tak tawh a. Kan thenawm unaute hian kan Chief Minister hi hotuah an rawn pawm tlat a ni,” a ti.

“Pathianin zofate daidanna ramri min thiahsak mek a, tunah hian thinlung ramri a chim ta mek a. Rorelna pakhat hnuaia awm thu aupui thin mah ila, a chhunga chengte thinlung a inrem loh chuan a thleng thei lo. Tunah hian kan thinlung a inzawm mek a ni,” Vena chuan a ti bawk.