Zirtawpni tuka Ukhrul district, Manipur-a Kuki khua, Thawai-a mi pathum thah an nihna hmunah Border Security Force (BSF) team dah an ni dawn nia sawi a ni.

Heng lai hmuna tlang hmun hrang hrangah ralthuam keng mi thattute hi venhim hna thawktuten an biruk ringin zawn beihpui an la thlak mek bawk.

BSF company 60 zet chu Manipur-ah hian district pakuaah dah an ni dawn nia sawina a awm bawk a, dan leh thupek kengkawh tura a awm sa mek dangte an pui dawn nia sawi a ni.

Tun hnai maiah khan BSF (EC) ADG Sonali Mishra leh officer dang pali chuan Governor Anusuiya Uikey pawh Raj Bhavan-ah kawmin hmarchhak state-a venhimna dinhmun hi an sawipui tawh a ni.

Zirtawpni khaw var hmaa Thawai khuaa thil thleng kha May 3 atanga he state-a hnam hnih, Meitei leh Kuki intihbuaina a chhuah hnua chawlhkar hnih chhung zet tharum thawhna a thlen loh hnuah thleng leh hmasa ber a ni nghe nghe.

Nasa taka inkahna a thlen hnuah vantlangin khaw chhehvel ramngawte an dap a, ruang pathum an hmu chhuak a ni.

May 3 atanga Kuki leh Meitei intihbuainaah hian mi 180 chuang thi awm tawhin mi sang tal baihvaiin an awm mek bawka. Kuki-ten Meitei-inn Scheduled Tribes (ST) status neih ve an phut an duh lohna atanga buaina hi chhuak a ni.