Aizawl July 13, 2023 : Bhatratiya Janata Party (BJP) Mizoram Vice President chuan Manipur-a Kristiante Pathian Biak In leh kohhran building tam tak hal ral chu a dem avang leh Union Minister Amit Shah-in Imphal a tlawh tum pawha Biak In hal chungchang lam engmah a sawi loh avangin a bang tih State President hnenah ziakin a thlen.

BJP Vice President R. Vanramchhuanga chuan Mizoram hmasawna atan hna a thawh theih a rin avanga BJP a zawm thu a tarlang a. Manipur state-ah May 3, 2023 atangin buaina chhuaka. Meitei militants ten Kristian Pathian Biak In te, Pastor Quarters leh kohhran Office building 357 lai an hal leh hnuah pawh Manipur state Chief Minister N.Biren Singh-an a sawisel miah lo te, Union Home Minister Shri Amit Shah pawh Imphal khawpuiah a han kalin Biak in hal chungchang hi a sawi lo va, a kal hnu pawhin an hal zui reng bawk. Central sawrkar thuneitute pawhin Kristiante Pathian Biak In hal a ni hi an dem thu emaw, pawi an tih thu emaw, an sawi lo va, rem an tihpui a rinthu a sawi. 

R. Vanramchhuanga chuan, "Manipur-a Kristiante Pathian Biak In leh kohhran building tam tak hal chiam mai hi ka dem a, ka duh lo takzet. Chuvangin ka duh lohna lantir nan BJP Mizoram State Vice President ka nihna hi tun atangin ka bansan a ni tih ka han hriattir a che," tiin President hi a hriattir a ni.