Manipur-a Zofa hnam hruaitu, Indigenous Tribal Leaders’ Forum (ITLF) hruaitute chuan Mizoram Chief Minister Zoramthanga kawmin a ngaihsakna avanga lawm thu an hrilh.

ITLF hruaitute hian Zoramthanga hi a chenna banglaah an kawm a. Nilaini chawhnua Union Home Minister Amit Shah-a hova sorkar mi pawimawh dangte nena an inbiakna chungchang an hrilh a, an state-a harsatna an tawh meka a ngaihsakna leh buaipuinaah lawm thu hrilhin, “Pa ber hnenah lawmthu sawi hmasa lo chuan Aizawl kan chhuahsan thei lo a ni,” an ti.

Chief minister pawhin ITLF hruaitute nena an inkawm thu hi Instagram-ah tar langin an kal zel dan tur chungchangah a hnen atanga thurawn an beisei angin thurawn a pe bawk.

ITLF hruaitute hian Zirtawpni hian Manipur an pan dawn a, chief minister hian tluang taka an zinkawng zawh zel turin duhsakna a hlan bawk.