Zohnahthlak Christian Network buatsaihin August 17 leh 18 zan hian Vanapa Hall-ah Manipura Zohnahthlakte pualin charity concert neih a ni dawn.

He charity concert-ah hian a duh duh tel theih a ni a, ticket man awm lovin a thlawnin a luh theih dawn. A hmunah erawh Manipur atanga sahimna zawnga raltlan mekte leh a hmuna hreawm leh baihvai taka awm mekte tan tanpuina bawm dawh a ni ang a, in lam atanga lo entute tan a duh apiang tan Live Phone In kaltlangin pawisa-a tanpui duhte tan hun remchang siam a ni ang. Mizo mipui mi inphal bikte tan Donor's Card eng emaw zat sem chhuah a ni bawk.

Mizorama artist lar ber ber - Zaii Hauchhum, David Darlong, Jauvi, Benjamin Sum, Zoramchhani Band, Faktu, Siampuii Ralte, Vanlalhmangaiha, Kimkima, G'nie, Rpa Ralte, OPA (Tribal power) leh artist dang eng emaw zat an zai ang. 

Live music nen top artist mi 22 laiin zaiin mipui an awi dawn a, Manipur atangin zaithiam tak takte an rawn perform dawn bawk a ni. - a kar lakah magic show hmuhnawm tak a awm bawk ang. He Charity Concert atan hian Aizawl Municipal Corporation, D3 Business Enterprise, Active Sound te leh, media partner - ZCN, Rainbow Mizo Channel, Alpha Mizo Production, Elite Studio Production, Zorimawi, Mizo Official Channel te nen thawhho a ni bawk. He Concert hi Zonet, LPS 5 leh YouYube channel hrang hrangah live-a pek chhuah a ni ang.