Aizawl January 28, 2024 : Bairabi atanga Sairang inkar relkawng siam hna chu harsatna neuh neuh a awm avangin a hun takah zawh theih a ni lo a. Ruahman dan chuan March thla hian Kawnpui thleng kaltira October, 2024-ah chuan Sairang thleng kaltir theih tawh beisei a ni.

Kilometer 51.38-a thui, Bairabi to Sairang kawng siam nan hian a tirah Rs. vaibelchhe 2,393.49 ruahman niin a hnuaah Rs. vbc 5,021.45-ah revise a ni a, a zawhna atan hian Rs. vbc. 6,527 vel ngai tura chhut a ni.

Sairang bula lei chim vangin hnathawh thenkhat khaihlak deuh mah se hmun dangah chuan harsatna awm lovin hnathawh chhunzawm zel a ni a, hei vang hian Kawnpui thleng rel kawng siam hna chu March, 2024 hian zawh tum a ni.

Relkawng siam hna hi a pum puiah 90% aia tam thawh zawh tawh a ni a, major bridge siam hna thawh mek tih lohah chuan hnathawh hi zawh fel thuai beisei a ni.

Bairabi-Sairang relkawng hi Broad Gauge Railway Line tur a ni dawn a. RITES-ten he relkawng sial survey hna hi 2005 bawr khan an zo fel a. A siam hna hi sawrkar laipuiin kum 2008-2009 khan sanction-in hna hi 2015-ah khan tan niin he hna viltu railways engineer-te chuan November/December, 2023-ah zawh fel beisei a nih thu an sawi.

Bairabi atanga intanin Sairang huam telin rel station pali a awm dawn a. Chungte chu Bairabi atanga a hlat zawng tehin, km16.38-ah Hortoki Rel Station; km 26.10-ah Kawnpui Rel Station; km 37.12-ah Mualkhang Rel Station leh a tawpna, km 51.38-ah Sairang Rel Station (Sihmui) te an ni. Heng hmuna rel station building thenkhatte chu sak zawh thawkhat an ni tawh a ni.

Bairabi to Sairang inkar rel kawng thui zawng hi km 51.38 niin lei dawh lian (major bridge) 55 leh lei dawh tenau (minor bridge) 87 a awm a. Hmun 32 laiah leiverh (tunnel) a awm a, leiverh zawng zawng thui/sei belhkhawm pawh hi km 12.63 a ni dawn a. Tunnel thui ber sei/thui zawng chu km 1.88-a thui a ni.

He project atan railways-in ram hectare 481.18-a zau an hmang mek a. Kolasib district huam chhungah forest ram hectare 38.94-a zau leh non-forest land mi mal ram hectare 308.01-a zau leh Aizawl district huam chhungah forest ram hectare 35.547-a zau leh non forest land mi mal ram hectare 98.595-a zau an hmang a. Heng zawng zawngah hian zangnadawmna Rs. vaibelchhe 840 bawr vel ram neitute pek an nih tawh nia thudawn a ni.