January 10, 2024; Lalremruata Chhangte, MNF Secretary, 2023 MLA inthlana Hrangturzo bial MNF candidate chuan January 8th, 2024 atanga vawiin thlengin Hrangturzo biala khaw hrang hrang 17 ah kalin 2023 kumtawp MLA inthlana amah duhsaka vote petu bial mipuite chungah lawmthu a sawi.

Maremruata chuan, "Kan hotute duhsakna changin MNF candidate niin kan bialah ka rawn ding a, a vanduai zawkah tang mah ila, kumdang aiin kan vote hmuh a tha hle zawk a, vote 5000 chuang lai min petu bial mipuite chungah thinlung leh tihtak zetin lawmthu ka rawn sawi a ni,” a ti.

“ Inthlan, mipui kuthlakah chuan a vanduai leh vannei pawl kan awm a ngai a, Pathian rorel dan kan pawm thiam a ngai a ni. He bial tan hian ka theihtawp ka rawn chhuah zel dawn a, bial mipuite pawhin chhiat that kan neihah in hrilh hreh lo ila, he bial hmasawnnan kan tanrual zel a ngai a, Pathianin hun a tih ah MNF chuan rorelna kan chang leh mai dawn a ni,” a ti.

“ Thlan tlin zawk ZPM MLA duhsakna ka hlan a, bial tan theihtawp chhuah turin kan beisei a, thil tha ah chuan kan thlawp tlat ang,” a ti bawk.