Aizawl June 27, 2024 : Mizoram Pradesh Youth Congress Committee chuan CTI Sesawng-a Ram leh Hnam tana Martar-te lungphun champhaphak vawi 27-na chu vawiin khan MPYCC Office, Congress Bhawan, Aizawl-ah an hmang. MPYCC President Laltawnliana chuan, "Ram leh hnam tana nun hlantu hnam Martar-te Mizo hnam a awm chhung chuan hriatreng an ni tawh ang," a ti.

MPYCC President Laltawnliana chuan kum 1966-1986 chhunga rambuai hun chhungin nunna chân zawng zawngte hi Congress thalai chuan 'Mizoram tana nunna hlan, ram leh hnam tana Martar-ah a ngai a ni,' a ti.

"Martar-te leh an chhungte hi Congress Party hian a ngaihsak a. 1986 atanga MNF sawrkar lai pawha an din sak theih loh Peace Accord Review Committee chu kum 2008 khan Lal Thanhawla kaihhruai Congress party in a din a. Martar-te chhungkaw tan hamthatna awm theite a dap sak a, Martar chhungkua mi 13 tan sawrkar hna a ngaihtuah sak bakah Central sawrkarah Housing Assistance dil sak an ni," a ti.

Congress Thalai President chuan, "MNF sawrkarin a tih sak theih loh sawrkar hna 70 chuang - Assistant 2, UDC 4, LDC 18, IV grade 46 te chu Lal Thanhawla kaihhruai Congress party in martar chhungkua te hmuh sakin a pe. PAMRA chhungkua 200 tan a bikin NLUP tanpuina pek niin NLUP Convergence atangin mi 120 pek leh an ni. Martar chhungkua 40 hnenah rangva bundle 180 a pe a, martar chhungkua 100 NLUP a bika pek an ni," a ti bawk.

Martar-te hriatrengna Lungphun CTI Sesawnga mi hi Martar-te puala lungphun hmasa ber niin June 27, 1997 khan Mizoram Pradesh Congress Committee President leh khatih hunlaia Chief Minister ni bawk Lal Thanhawla'n a hawng a. He hriatrengna lungphun hi MPYCC buatsaiha bultan a ni a. Martar-te hriatrengna lungphun hi kum tin June ni 27-ah CTI Sesawngah hman thin a ni. He lungphunah hian mi 1168 ziah lan an ni tawh a. Kum 2014 khan Sergeant Lalhuha ruhro pawh phum leh niin, ziah belh tûr awm ang te pawh ziah belh zel theih tûra ruahman a ni.