Maternity leave pawtsei turin Synod-in hmalak tum

Admin - Dec 12, 2021

Ramri buai chungchang sawihona duhtawk

Aizawl : Republic Veng Kohhrana Republic Pastor bial in a thlen Synod Inkhawmpui vawi 98-na palai rorel chunizan khan zawh fel niin sawrkar hnathawk ten nau neih chawlh (maternity leave) an neih thin pekbelh rawtna lut chu tha an ti a, state ramri buai chungchanga inrawlh tura rawtna lutah thulukna siam a ni lo.     

    Nau piang pun theih nan hian Mizoram Synod chuan nasa takin hma a la mek a, kumin rorel inkhawma sawrkar hnathawkte nau nei chawlh lak tisei tura rawtna pawm a nih rual hian SEC chu hma la tura tih an ni nghal bawk a ni. 

    Tualchhung Kohhran thenkhat chuan nau piang lawmmante an hlan thin a. Nau nei chawlh pek belh rawtna pawm pawh hi nau piang an pun theih nana hmalakna pakhat a ni bawk.    

    State ramri buai chungchangah sawrkar tichak tura hmalak leh rawtna chungchang pawh sawiho a ni a, hemi-ah hian thutlukna siam a ni mai lo a; mahse, sawihona chu an duhtawk thung a ni.

    Palai kal-khawmte chuan Synod hnuaia chetvelnaa sap tawng hmante a theih chen chenah Mizo tawnga thlak rawtna chu tha an ti a, hmalak mekna a nih thu sawiin inhrilhfiahna neih a ni.

    General Agenda zawhah hian SEC leh Board/Committee atanga thu lutte rel zui nghal a ni a. Secretary (2022 – 2024) thlan thar pathum (3) – Rev. C. Zorammawia, Sr. Executive Secretary; Rev. V.L Luaia Hranleh, Executive Secretary leh Rev. Dr. K. Lallawmzuala, Executive Secretary te hna chanpual theuh ruahman a ni. 

    Administrative Secretary (2022 – 2024) thlan thar pathum (3) te awmna tur pawh Rev. Lalrintluanga Ngente – Barak Area,  Rev. H. Lallianzara – Chhim Bial leh Rev. P.B Zosapthara – Manipur Area tiin siamrem nghal a ni. 

    Department pali-a hotu thar turte ruat ni bawkin Synod Mission Board Secretary (2022 – 2024) -  Rev. R. Lalhmingsanga, ATC Principal (2022 – 2025) - Rev. Dr. Tlanghmingthanga, Editor SL&PB (2022 – 2024) - Rev. Lalbiaknia leh Director Synod Hospital (2022 – 2024) - Dr. Lalthakima te an ni.

    Vawiin lam hian rawngbawltu nemngheh leh valedictory sermon hun hman a ni ang.

Share now