Aizawl: Mizoram Mathematics Society chuan Mizoram Science, Technology and Innovation Council (MISTIC) nena tangkawpin a vawi 11-na atan Mizoram pum huap Mathematics inelna heng pawl hrang hrang - V, VIII, X & XII-ah te nimin khan a buatsaih.
He inelna hi centre pariat - Aizawl, Lunglei, Champhai, Serchhip, Mamit, Kolasib, Siaha leh Saitual ah te neih a ni a. Exam tura hming pe hi Aizawl centre-ah 1717, Lungleiah 578, Champhaiah 243, Serchhipah 228, Mamitah 28, Kolasib 119, Siaha 42 leh Saitualah 327, an vaiin 3182 an ni. Exam hi Class V, VIII, X leh XII zirlaite tana buatsaih a ni a, Class V zirlai 973, VIII - 929, X - 984 leh Class XII - 306 an ni.
He exam hi Mizo zirlaiten Mathematics an hlauhna tihbona a nih theih beiseiin kum 2007 atang khan neih tan a ni a. Kum tin zirlaite leh nu leh pa ten hlut telh telhin exam beitu pawh an pung chho zel a ni.
Mizoram Mathematics Society chuan he inelna buatsaih a nih theih nana sum leh pai ngaihtuahsaktu MISTIC chungah te, exam beitu zirlai zawng zawng te, zirtirtu leh zirlai nu leh pa te chungah lawmthu a sawi a ni.