ZALEN October 12, 2024 : Maubawk Branch YMA chuan Zirtawp zan khan an din champhaphak kum 77-na leh Vangpui Kut 2024 an hmang a, Aizawl West III bialtu MLA VL Zaithanzama chuan kut thlengtu niin a hmanpui.

Bialtu MLA VL Zaithanzama chuan, "YMA-in ram leh hnam humhalh kum a puan mekah a pawimawh ber zinga ka hriat chu pian pun a ni," a ti. MLA chuan, "Mizote hi kan la tlem em em a, chutihlaiin naupiang an tlem bawk si a, kan punna rate hi a hniam em em a. Kan tam loh chuan chimral kan awl dawn tih a chiang reng a, Juda ho khu chuan Israel ni a in ngai chu an lo pawm vek mai a, keini pawhin kan chenpui leh thurualpui theihte kan kuahkhawm theih a ngai a ni," a ti bawk.

Aizawla veng hlun ber pakhat Maubawk Branch YMA-in kum 77 hmel hmu chu a lawmpui tak zet thu a sawi a, YMA kum puan ram leh hnam humhalh kawngah pawh an thawhhlawk thu leh ram leh hnam humhalh kawngah pawh lawmman pathumna an dawng thei chu a lawmpui thu a sawi.

Maubawk Branch YMA hi ni 11.10.1947 khan din a ni a, kum 2011 atang khan kumtin Branch din champha lawmin Vangpui kut an hmang thin a, kumin hian member 2180 an awm mek a ni. Kut lawmna inkhawm hi Vanlalchhuanga, Branch President-in a kaihruai a, zaithiamte sawmin intihhlimna hun ropui takin an hmang a, veng mipuiin an hlut hle a ni.