November 22, 2022; Hnahthial district, Maudarh ABCI quarry chim a ruang zawn hna chu ni 9 chhung thawh ni tawhin, he thu ziahlai thleng hian ruang hmuh loh pakhat a la awm a, ngawrh taka zawn chhunzawm zel a ni. 

K.Lalremruata L.O. ABCI Infrastructures Pvt Ltd (NHIDCL) hnen atanga ZALEN thudawn danin, ruang pakhat la hmuhloh Jahidul Islam (27), Assam mi chu a u leh nau mi pathum te tukin khan Maudarh an thleng a, Maudarh Quarry chimna hmun panpui nghal an ni a, ABCI Maudarh camp pakhat a an awmna tur pek nghal an ni.

Hnahthial Magistrate hovin hmalak dan tur a hmunah mitthi chhungte leh company lam hotute nen ruahmanna siam niin, mitthi ruang hi an chhungten hmuh theih hram a hawn thlak theih an duh a, a awmna bial mtrs.10 mtrs vel ni thum chhung zawn hna thawh leh a ni ang a, ruang hi hmuh ala nih loh chuan mitthi chhungte nen hmalak leh dan tur sawiho leh a ni ang.

Maudarh quarry chim a thi tate chhung hnenah hian Central sorkar chuan Rs. Nuai 2 a pe theuh dawn a, ABCI company in Rs. Nuai 1 leh Assam sorkar chuan Assam mi leh sa thi chhungte hnenah Rs. Nuai 2.5 theuh a pe dawn bawk.

Ruang zawnna hmun hi NDRF India, 2 Bn MAP Lunglei, 3 Bn MAP Canine Squad-te, GM NHIDCL etc leh Hnahthial Police te, Leite khawtlang hruaitu ten an vil reng bawk. Mizo danah ni sarih zawn a nih hnuah YMA Leite Branch lam chuan ruang zawn hi an chawlhsan a, quarry erawh an thlithlai reng thung.