July 14, 2023; Mizoram ah Maxi Cab driver 1,400 chuang an awm a, chung zing a hmeichhe awm chhun chu Pi Thuamtei (48), Edenthar, Aizawl niin, Aizawl - Champhai/Zokhawthar a service thin.

ZALEN in a biakna ah Pi Thuamtei chuan kum 2018 atangin Maxi Cab, Aizawl - Champhai/Zokhawthar a service tan tih sawiin, chumi hma pawhin construction company ah te motor lian zawk dangte pawh a lo khalh tawh thin.

"Hmeichhe dangte angin thiam ka nei tam ve lo a, lirthei khalh hi ka thiam ve zawng tak a ni a, thiam ka neih tlem vang zawk a lirthei khalh ka ni," Pi Thuamtei chuan tiin, "Pathian in mal min sawm a, zinkawng thui tak zawh thin mahila, hriselna lamah harsatna lutuk ka nei lo," a ti.

Hmeichhia a nih vangin a passenger te lak atangin harsatna tawh a nei ngai lo a, mak ti deuh a, hmeichhia a nih vang a ring zo chiah lo te erawh tawn chang a nei thin.

Anmahni lirthei 'Joselynn' Maxi Cab khalhtu Pi Thuamtei thawhrimna leh chhelna, a thiamna leh a paukhauhna te hi mipa te tan pawh a entawntlak leh inzirna tling a ni.

A eizawnna kal zel turah ZALEN chuan duhsakna sang ber kan hlan!

Maxi Cab driver ah hian hmeichhe 2 an awm thin a, pakhat zawk erawhin sawrkar ah hna a hmuh tak avangin, tun dinhmun ah chuan Pi Thuamtei chauh hi a ni ta a ni.