ZALEN, Mar. 09, 2026: May 11 atanga June 13, 2026 chhungin LPS Arena, Falkland-ah mipa team sarih leh hmeichhe team li inelna Pro Volleyball League vawi kuana khelh a ni dawn.

Thawhtanniah LPS Vision Director Lalsawmliana Pachuau office, Zarkawtah LPS leh Mizoram Volleyball Association (MVA)-in inremna an siam a, mipa inkhel 24 leh hmeichhe inkhel tum sarih, a vaiin inkhel 31 a awm ang.

Inkhel zawng zawng zan dar 8-ah deuh vek tan tura ruahman niin, LPS Vision-in live-in a pe chhuak vek dawn a ni.

Mipa team pasarih - Anastasia Electric Veng, Thutak Nunpuitu Team, Tuichangral, Khawbel, Sihphir, Hunthar leh Chhinga Veng Spikers te vawi khat theuh an inkhelh kual chhuah hnua a sang paliin semifinal an lut ang.

Hmeichhe team li - Tuichangral, Chhinga Veng Spikers, ITI Veng leh Eric Pautu Academy te tum khat theuh an inkhelh kual chhuah hnua a sang pahnihin final an lut ve thung dawn a. June 12-ah hmeichhe final a ni ang a, June 13-ah mipa final hmangin championship hmawrbawk a ni dawn a ni.

Championship hnuhnung ber final-ah May 24, 2025 khan Anastasia-in 26-24, 25-10, 21-25, 25-21 (3-1)-a TNT hnehin a vawi hnih nan mipa Pro Volleyball-ah an champion a. May 23, 2025 hmeichhe final inkhelah Luangmualin 25-20, 25-20, 21-25, 25-21 (3-1)-in Jimmy Club, Kanan an hneh ve thung a, a zawna vawi thum an champion-na a ni.

Tun season-ah nikuma hmeichhe final lut team pahnih an tel zui lo va, a vawi khat nan champion tumin team thar pali a inel dawn tihna a ni a. Mipaah nikuma tel team paruk an awm zui leh vek a, hremna avanga season liam taa tel thei lo, Chhinga Veng an kir leh bawk a ni.