Mizorama badminton player-ten tual chhung inelna zinga an ngaihlut hlawh ber leh champion nih pawh an châkna ber, NEXA GIG MOTORS MBA Official Championship 2024 (Junior & Senior) chu Thawhlehni atang hian Ramhlun Indoor Stadium-ah khelh tan a ni ta a. Junior category khelh hmasakah hian India-a an rualpui zinga champion ni thei leh thiam ber ber an inlan dawn.

MBA Official Championship hi Badminton Association of India (BAI) calendar-a chuang phak niin player-ten an ngai pawimawhin ngaihhlut pawh a hlawh zual thin.

Junior category bik hi Inrinni thleng khelh tur niin senior chu karlehah khelh tur a ni dawn a. Category hniha inlan kawp tur pawh an awm nual.

Junior-ah hian Under-11 atanga Under-19 inkar category hrang hrang 16-ah inelna neih a ni dawn a. Inelna hmachhawn tura hming pe pawh player 215 an awm a, inkhel 280 chuang a awm dawn a. Inkhel tur an tam deuh avâng hian Junior hi Ramhlun Indoor Stadium bakah Govt. Mizo High School Hall, Chanmari-ah a tir lamah khelh tel a ni.

Tun tum juior huangah hian India ram pum huap pawha hriat hlawh an inlan nual dawn a. Kar kaltaa All India Sub-Junior National Ranking Tournament, Hyderabad-a bronze medal latu, Sainunmawia Sailo, Ramhlun Venglai pawh category thumah inlan a tum a, senior-ah pawh ilan a tum.

Saia hi a u, Saitluangpuia Sailo pawh senior-a inlan turin a inbuatsaih a. An unau hi Kotak Pulella Gopichand Badminton Academy (KPGBA), Hyderabad-a inzira awm mek niin tun dinhmuna Mizo player tha berte zinga mi an ni.

Saia te unau bakah hian KPGBA-a an awmpui, National Ranking Tournament-a champion thei leh vawi li lai medal lo la tawh, Malsawmhlua (Mama), Serchhip pawh category thuma inlan turin a inbuatsaih bawk.

Anni bakah hian BAI-in a thiam bikte inzirna atana a din, National Centre of Excellence, Guwahati, Assam-a hun puma training nei mek, C. Lalramsanga, Durtlang pawh a inlan dawn bawk a. He hmuna inzir mek dang, Lalrempuii, Serchhip pawh inlan tumin a haw a, category pakhat mai lova champion tura rinkai zingah a tel.

Ramsanga leh Rempuia te pahnih tangdun hi India hmarchhaka mixed doubles champion lai an ni nghe nghe.

Anni bakah KPGBA a training nei mek, H. Lalrinhlui, Chanmari West leh Zoramthari Renthlei, Champhai Vengthlang te pawh an inlan dawn a, anni hi India ram pum huap pawha a tha pariat zinga lang phak deuh reng an ni.

ITM University Badminton Academy-a inzir mek, Vanlalpekhlua Sailo leh Vanlalhruaia Sailo te unau pawh he tournament khelh tum hian an haw a. Lalrinkimi, Mission veng, Anup Sridhar Badminton Academy, Bangalore-a traning nei mek pawh a inlan dawn bawk. 

Hengho bakah hian TATA Trusts (NEIDA) leh MBA thawhhonaa din, Aizawl leh Serchhip-a Regional Intensive Training Centre-a coaching kal mekte pawh an tel vek dawn a, Grassroot Centre kalpui mekna hmun 25 atangin player an inlan nual dawn bawk.

Junior-a inlan tur player langsar tak takte hi senior-ah pawh an inlan tel dawn a. Senior hi category panga - men's singles, women's singles, men's doubles, women's doubles leh mixed doubles-ah inelna neih a ni ang.

Tar lan tawh angin tun tum championship-ah hian Mizoram sorkara Women & Child Development, TATA Trusts (NEIDA) leh MBA thawhhona hnuaiah tournament-a hmeichhe tel an pun theih nan lawmmana an dawn pawisa fai tihpun a ni dawn bawk a. Hei bakah hian Grassroot Centre ti thate tan lawmman siam a ni bawk ang.

Tournament hi ni tin, a bul atanga a tawp thlengin MBA YouTube channel-ah live-a pekchhuah thin a ni.