Chhuak tur anga sawi reng Mbappe chu chhuak lovin thuneihna eng emaw zat nen PSG lamah a cham rih dawn a, beisei loh zawk an manager Pochettino a chhuk thung. An manager chhuah chhanah Mbappe an puh...

Club hausa Paris Saint-Germain boss Mauricio Pochettino hian club-in an duh ber Champions League trophy chu a chawipui hle thei lo va. Paris lamah UCL trophy a hawn mai theih loh vang hian dinhmun derthawnga a awmna a rei tawh ang reng a. Thla hmasa khan a club enkawl Paris Saint-Germain chu a chhuahsan ta nge nge. Argentine coach chhuah chhanah hian Kylian Mbappe chu thuk taka a inrawlh ring an tam. Social media lamah Mbappe chuan a boss hlui chhuah chhanah hian a inrawlh loh thu sawiin mi thenkhat puhna chu a pha nasa hle bawk. 

Nikum Champions League khan last 16-ah Real Madrid hneh lovin PSG hi an tla a, khami tum atang phei kha chuan club thuneitu lam lawm a hlawh lo lehzual a, a aiawh tur coach thar an hmuh huna ban turin thutlukna an siam a, a aiawh turin Christophe Galtier an hmuh hnuah Pochettino chu a chhuak nghal.

An interview tumin Argentinian Pochettino chuan,"PSG-in Kylian kawl zui tur hian PSG chuan theih tawp an chhuah a, an hlawhtling a, Kylian-a an thlem thk leh pawh hi ka pawmpui thlap. Tunlai chhanah khawvel football player tha ber pakhat a ni. Thuneihna sang tak nen a cham zui naa tun tuma ka chhuah chungchangah hi chuan a inrawlh lovin ka hria. Heng thu tlukna siamtu hi chu club president a ni," a ti.