May 19, 2022; Mara District Congress Committee (MDCC) president S Hiato chuan Mizoram Pradesh Congress Committee (MPCC) atangin 'show cause notice' an la dawng lo tih sawiin, an dawng a nih pawhin tha taka lo chhan an tum tih ZALEN a hrilh.

S Hiato chuan ZALEN zawhna chhang a he thu hi sawiin, tun thleng chuan an party MPCC president statement bak hmuh an la nei lo tih sawiin, "Engmah an la rawn ti lo a, show cause notice min rawn pe a nih pawhin kan inrawn khawm ang a, tha takin kan chhang ang, tun ah chuan MPCC president statement bak hmuh kan la nei lo," a ti. MADC a sawrkar siamna tur chu an hotute thu a ni tih an hriat rualin, tuna an dinhmunah kal lo thei lo an nih thu a sawi.

Tarlan tawh angin, MPCC president Lalsawta chuan statement siamin, MADC ah sawrkar siam turin BJP leh MNF thawhpui loh an rel tawh thu a tarlang a, chutih laia Mara District Congress Committee (MDCC) leh MDC ten MNF te sawrkar siampui an tum chu an ngaih thutak thu leh insawifiah tura hriattirna pek a ngaih dawn thu a puang a ni.

MNF & INC Joint Legislature chuan MDC 13 neiin, BJP in MDC 12 an nei a, Phura biala thlan tlin MDC H. Malvin chu chief executive member (CEM) a ni ang a, Amotlah biala thlan tlin MNF MDC HC. Lalmalsawma Zasai chu deputy CEM a ni ang. MADC chairman atan N. Viakhu (MNF) thlan a ni bawk.