Mizo zaimite inzawm khawmna pawl lian Music Domain Mizoram (MDM) chuan Zirtawpni zan khan Dawrpui Multipurpose Centre-ah General Assembly an nei a, hruaitu thar thlanna an nei nghal. He hunah hian MDM Award 2022 sem a ni a, ShiRock winner The Prophets te chu band of the Year atan thlan an ni a, YouTube lama 'million views' nei tling artist 55 te chawimawina hlan an ni bawk. 

Gospel leh Lengzem/Lenglawng huangah award hrang hrang sem a ni a, Band leh Best Group/Duo te a awm bawk - band leh mimal artist 17 hnenah award hlan an ni. YouTube-a million views nei tling hi mimal bakah, band leh gropu member te nen 55 zet an awm bawk a, hmasawnna rahbi pawimawh tak pakhat a ni. 

Gospel 
Gospel huangah Sawmtea Chhangte chu Male Artist of the Year atan thlan a ni a, hmeichhe lamah Maruati Hnamte chu Female Artist of the Year atan thlan a ni. Best New Artist atan artist thang duang Angaihtei Hnialum thlan a ni a, Best Group/Duo of the Year award chu One in Christ te hnenah hlan a ni - an phu e. 

R&B Singer of the Year award chu Hmingtea Chhangte hnenah hlan a ni a, Thazual Award 2021-a Best Music Video dawngtu C. Lalremruata chuan 'Sulam Lenmawi' hmang bawkin he award hi a dawng leh a ni. 

Lengzem & Lenglawng
Lengzem leh Lenglawng lamah tun laia kan zaithiam neih that ber ber ten award an dawng. Best Male Artist of the Year atan Manuna Chuaungo thlan a ni a, hmeichhe lamah pawh tu dang tluk rual lohin Jauvi chu Best Female Artist of the Year atan thlan a ni. Best New Artist ward chu Latei Hringen kutah hlan a ni a, Keimah Senes & Tlangval Tlumtea te pawhin Best Group/Duo of the Year award an hum haw. MDM Zaipawl of the Year chu Sub Headquarters YMA Zaipawl, Lunglei te an ni.

Folk Singer of the Year chu Mabiaki Pachuaua ni a, Song writer of the Year atan 'Kan KHua' tih hla phuahtu Peka Fanai thlan a ni. R&B Singer of the Year award dawngtu chu Rebbecca Lallawmsangi a ni - thik rual a ni lo. JHe tih lai hian Best Music Video lawmman latu chu Feli Fanai a ni a, 'Chhing mittui a hul zo ta' tih hla hmang kha he award hi a hlawh chhuak a ni.

Leikapui
Mizo rimawi khawvelah chuan Leikapui zai hi a chuai thei mawlh lo, award dawngtute pawh a tha ber ber vek an ni. Leikapui Singer of the Year (Male) atan Kimkima thlan a ni a, hmeichhe lamah Sangkimi Khiangte te chu Leikapui Singer of the Year a ni. 

Million views
YouTube-a million views neih tlin hi thil na mai lo tak a ni - Mizoram mipui zat atanga chhut phei chuan kan artist thahnem takin hetia zat entu an nei hi a lawmawm tak zet. Rebecca Lallawmsangi chuan hla pathum - Kan khua, Dam dam leh Zinkawng tih hla hmangin million views a nei tling vek - Mizo mipuiah a tlana tih loh rual a ni lo. 

Lilzo-a'n hla paruk zet chuan million views an kai bawk a, namai lo tak a ni. Heng a hla te hi - A tawk a tawk, Duati, Hmalam pan a hun, Ka natna I chhawk, Ka sawm che leh A na dawn a sin tih te a ni, a hun laia a hla lar tak tak vek an ni. 

Kimkima chuan maktaduai khat chuangin an ena an ngaihthlak hla panga zet a nei a, mimala chawimawi phu ber a ni hial awm e. Heng a hla - Leikapuirun ka bel, Ka damlo, Rangkadartuiluani, Ka thinlung tan rukru leh Tha-hming te entu zawng zawng belhkhawm hi namai lo tak a ni - chawimawi a phu e. Feli Fanai pawh a duai bik lo, hla panga zet chu million views kai a nei. Lengdang tang a bel, Lungrun, Pheichhehmawi I khai ang, Tuman an tluklo leh Ti ve mai la te chu mipuiin an en nasat zual an ni. Jt Production pawhin million views kai phak hla panga a nei ve bawk. 

Anni bakah hian - Stacy Punte, Maruati Hnamte, R. Lalbiaksanga, Pensy B. Lalthangliani, F. Zomuanpuia, Jaui, Zorinzuali KHiangte, Awmtea Polymer, Siampuii Ralte, Bethsy Lalrinsangai leh Pensy B. Lalthangliani te chu hla hit ngah zual an ni bawk. 

One In Christ an ropui
Award lak theih zawng zawng an hui kim deuh vek tawh ti ila kan sawi sual lo ang - Group-ah chuan an ni aia thlan tur chuang an awm bik lo. Million views-ah pawh a langsar ber an ni leh ta - hla pariat zet an thawh! Kei kher maw Lalpa, I mangan a hria, Lalpa thatna, A hmangaihna a lo ni, Min chhungkhat leh thin, Ka lawm e Lalpa, Phurrit a bo ta Kalvari-ah leh Hmangaihna ropui te chuan thlirtu maktaduai chuang an nei vek a ni. 

Adama leh Sangtei Renza ten Mizo mipui mai bakah, India ram chhung leh pawn thlengin an zai ngainatu an ngah tawk. Stumblin, Greatest Gift of All, I don’t want to talk about it, Sometimes when we touch, Island in the stream leh Sometimes love just ain’t enough te chuan million views an kai vek bawk a ni. 

MDM AWARD 2022 Winner
1) Male Artist of the Year (Gospel)
- Sawmtea Chhangte
2) Female Artist of the Year (Gospel)
- Maruati
3) Best new Artist (Gospel)
- Angaihtei Hnialum
4) Best Male Artist of the Year (Lengzem/Lenglawng)
- Manuna Chuaungo
5) Best Female Artist of the Year (Lengzem/Lenglawng)
- Jauvi
6) Best New Artist (Lengzem/Lenglawng)
- Latei Hringen
7) Best Group/Duo of the Year (Gospel)
- One in Christ
8) Best Group/Duo of the Year (Lengzem/Lenglawng)
- Keimah Senes & Tlangval Tlumtea
9) MDM Zaipawl of the Year
- Sub Headquarters YMA Zaipawl, Lunglei
10) Folk Singer of the Year
- Mabiaki Pachuau
11) Band of the Year
- The Prophets
12) Song writer of the Year
- Peka Fanai
13) Leikapui Singer of the Year (Male)
- Kimkima
14) Leikapui Singer of the Year (Female)
- Sangkimi Khiangte
15) R&B singer of the Year (Gospel)
- Hmingtea Chhangte
16) R&B Singer of the Year (Lengzem/Lenglawng)
- Rebbecca Lallawmsangi
16) Best Music Video (Gospel)
- C. Lalremruata (Sulam Lenmawi )
17) Best Music Video (Lengzem)
- Feli Fanai (Chhing mittui a hul zo ta)

MDM OB THARTE (2022-23)
President : R. Lalbiaksanga
Vice. Pre : C. Vanlalmalsawma
General Secretary : K. Lalremruata
Asst. Secretary : J.H Lallungmuana
Treasurer : Zonunmawii
Fin. Secretary : Lalnunkenga chuaungo