Mizo zaimite inzawm khawmna pawl lian Music Domain Mizoram (MDM) chuan vawiin hian General Assembly an nei dawn a, hruaitu thar thlanna an nei nghal ang. Asembly hi Dawrpui Multipurpose Centre-ah an nei dawn a, chawhnu dar 3:00pm atangin an tan anga zan lam thlengin hun an hmang ang. 

1st session hi MDM president ni lai R. Lalbiaksanga chuan a kaihruai dawn a, a khuhhawn nan One In Christ te an zai ang - tun hnaia pasal nei Hlimhlimi a zai dawn bawk. Rorel inkhawmin a zui ang a, zanriah an kilho nghal ang. 

2nd session hi General Election a ni thung dawn a, award sem leh millions view te chawimawina hun hman a ni bawk ang. 2nd session hi Zonunsangi Fanai (Zonuni) chuan a host dawn a, K. Lalthanzama, Joseph Construction Chairman chu khuallian a ni ang. MDM president-in thu a sawi dawn bakah, faktu ten Pathian fakna hla an sa ang a, ICT Department ten awareness campain an nei bawk ang. 

MDM te hian Manipur sawrkarin a buatsaih, Shirui Festival-a Rock Contest 'ShiRock 2022' winner Mizo band The Prophets te lawmpuina hun an hmang dawn bawk a ni. MDM hian General Assembly hi an hmang thin a, kumin hi a vawi sarihna a ni. Hruaitu thar thlanna an neih thin bakah, YouTube-a millions view nei tlingte chawimawina hun an hmang thin bawk.